Bakı şahmat “Qran-pri”sinin açılış vaxtı məlum oldu

Oktyabrın 1-də Bakıda şahmat üzrə Beynəlxalq Şahmat Federasiyasının (FİDE) “Qran-pri” seriyasına start veriləcək.



AzNews.az xəbər verir ki, turnirin açılış mərasimi saat 19-30-da Milli Təhlükəsizlik Nazirliyinin Mədəniyyət Mərkəzində keçiriləcək. Mərasimdə FİDE prezidenti Kirsan İlyumjinov, Gənclər və İdman Nazirliyinin, Azərbaycan Şahmat Federasiyasının rəhbərliyi, dövlət və hökumət nümayəndələri, eləcə də şahmatçılar iştirak edəcəklər.
"Qran-pri"nin ilk turu oktyabrın 2-də saat 15.00-da start götürəcək. Turnirin bütün partiyaları yarışın rəsmi saytı vasitəsi ilə canlı yayımlanacaq.

Azərbaycanı turnirdə qrossmeysterlər Şəhriyar Məmmədyarov və Teymur Rəcəbov təmsil edəcəklər. Eyni zamanda, Bakıdakı "Qran-pri"də Fabiano Karuana (İtaliya), Aleksandr Qrişuk (Rusiya), Hikaru Nakamura (ABŞ), Sergey Karyakin (Rusiya), Lenyer Dominqes (Kuba), Boris Gelfand (İsrail), Pyotr Svidler (Rusiya), Dmitri Andreykin (Rusiya), Rüstəm Qasımcanov (Özbəkistan) və Yevgeni Tomaşevski (Rusiya) birincilik uğrunda yarışacaqlar.

Qeyd edək ki, qaydalara əsasən, turnirə 16 şahmatçı qatılacaq və hər zəka sahibi 3 mərhələdə qüvvəsini sınayacaq. 4 ölkədə baş tutacaq 4 mərhələ oktyabrda başlayıb, gələn ilin mayında başa çatacaq.


AzNews.az