Qənirə Paşayeva Asiya Parlament Assambleyasının konfransında çıxış edib

Azərbaycanın Asiya Parlament Assambleyasındakı (APA) nümayəndə heyətinin rəhbəri Qənirə Paşayeva təşkilatın COVİD-19 pandemiyasına həsr olunmuş konfransda COVİD-19-la mübarizədə Azərbaycanın yerli və beynəlxalq səviyyədə gördüyü işlərdən danışıb

Ötən gün APA-nın COVİD-19 həsr olunmuş konfransı keçirilib.

AzNews.az xəbər verir ki, konfransın açılışında hazırda təşkilata sədrlik edən Türkiyə Böyük Millət Məclisinin Sədri Mustafa Şentop, İran İslam Şurası Məclisinin Sədri Məhəmməd Bakir Qalibaf, Türkiyənin APA-dakı nümayəndə heyətinin rəhbəri xanım Asuman Ərdoğan və üzv ölkələrin nümayəndə heyətlərin rəhbərləri çıxış edərək COVİD-19 qarşı mübarizənin güclənməsinin vacibliyini xüsusi vurğulayıblar.

Konfransda APA-ya üzv olan 20-dən çox ölkənin nümayəndə heyətin rəhbərləri çıxış ediblər, fikir mübadiləsi aparılıb, qətnamə lahiyəsi müzakirə olunub və müəyyən təkliflər irəli sürülüb.

APA-nın Baş katibi çıxışında bildirib ki, üç ölkə - Azərbaycan, Türkiyə və Küveytin təşkilatdakı nümayəndə heyətlərin rəhbərləri təşkilatın katibliyinə və üzv ölkələrə müraciət edərək belə bir onlayn konfransın çağırılmasına və COVİD-19-la mübarizədə APA üzv ölkələrin birgə səylərin gücləndirməsi ilə bağlı müzakirələrin vacibliyini bildiriblər. Hazırda təşkilata sədirlik edən belə bir vacib və əhəmiyyətli tədbirin təşkili üçün Türkiyə dövlətinə, onun APA-dakı nümayəndə heyətinə və təşkilatın Katibliyinə təşəkkürünü bildirən, Azərbaycan nümayəndə heyətinin rəhbəri Q.Paşayeva çıxışında bir çox vacib məqamlara toxunub:

”Hörmətli həmkarlarım, COVID-19 pandemiyasına qarşı ölkələrinizdə davamlı mübarizə aparılması çox təqdirəlayiqdir. Dünyanı cənginə alan bu virusa qarşı mübarizədə sizə dəstək olduğumuzu və sizinlə həmrəy olduğumuzu bildiririk. Özümün və Azərbaycan Respublikasının Asiya Parlament Assambleyasındakı nümayəndə heyətinin üzvləri adından, həlak olanların ailələrinə və yaxınlarına başsağlığı verir və pandemiyadan əziyyət çəkənlərin tezliklə sağalmasını diləyirəm. APA-nın üzv ölkələri tərəfindən görülən tədbirlərin təsirli olduğuna və "görünməyən düşmən" üzərində tezliklə məğlubiyyəti təmin edəcəyinə inanıram.

Azərbaycan koronavirusun yayılmasının qarşısını almaq üçün təxirəsalınmaz və zəruri tədbirlər gördü. Prezident İlham Əliyevin ilin əvvəlində verdiyi sərəncamdan sonra Nazirlər Kabineti yanında Operativ Qərargah yaradıldı. Pandemiya zamanı bizim üçün əsas prioritet insanların sağlamlığının qorunması və sosial müdafiəsidir. Koronavirusun (COVID-19) pandemiyasının mənfi nəticələrinin azaldılması üçün bir sıra tədbirlər haqqında Prezident Fərmanı imzalanmışdır. Tədbirlərin maliyyələşdirilməsi üçün Nazirlər Kabinetinə dövlət büdcəsindən 1 milyard manat vəsait ayrılmışdır. Fərmana əsasən, Koronavirusa qarşı Dəstək Fondu yaradıldı. Koronavirusla mübarizənin effektivliyini artırmaq üçün Fonda Prezidentin Ehtiyat Fondundan 20 milyon manat ayrıldı. Bundan əlavə, Prezident İlham Əliyev və Birinci Vitse-Prezident Mehriban Əliyeva illik maaşlarını fonda bağışladılar.

Qısa müddət ərzində 40-dan çox xəstəxana koronavirus xəstələrinin müalicəsi üçün ayrıldı. Ölkədə 29 sınaq laboratoriyası fəaliyyət göstərir. Bu günə qədər 500 mindən çox test keçirilmişdir. Bundan əlavə, bu dövrdə Bakıda Yeni Klinik tibb müəssisəsi və bir neçə modul tipli xəstəxana kompleksi istifadəyə verildi.
Biz COVID-19-u qarşılıqlı dəstəklə, özümüzə qapanmadan və yalnız birgə səylərlə məğlub edə bilərik. BMT baş katibi António Guterresin koronavirusla mübarizəyə dair qlobal humanitar cavab planı barədə açıqlamasını, BMT Baş Assambleyasında müvafiq qətnamələrin qəbul edilməsini və Ümumdünya Səhiyyə Təşkilatının pandemiyaya qarşı qlobal mübarizədə oynadığı vacib rolu təqdir edirik. Pandemiyanın ilk günlərindən ölkəmiz Ümumdünya Səhiyyə Təşkilatı ilə sıx təmasda olmuşdur. Ümumdünya Səhiyyə Təşkilatına görə, Azərbaycan pandemiyaya qarşı mübarizədə model ölkələrdən biri hesab olunmuşdur. Pandemiyadan zərər çəkən iqtisadiyyatın sektorlarını, işsizləri, iş yerlərini itirənləri, aztəminatlı insanları və hətta qeyri-rəsmi işlə məşğul olanları dəstəkləmək üçün də böyük vəsait (3 milyard manatdan çox vəsait) ayrıldı.

Koronavirus pandemiyası dünyadakı vəziyyəti tamamilə dəyişdirdi, nəticədə yeni reallıqlar ortaya çıxdı. Azərbaycan yeni vəziyyətə tez və adekvat reaksiya verdi. Bunu Azərbaycanın təşəbbüsü ilə Koronavirusa qarşı Qoşulmama Hərəkatının Təmas Qrupunun Zirvə toplantısı da sübut edir. “COVID-19-a qarşı birlikdəyik” adlı zirvə toplantısına dünyanın müxtəlif ölkələrindən 40-dan çox yüksək vəzifəli şəxs qatıldı. Yüksək səviyyəli görüşdə Birləşmiş Millətlər Təşkilatının və Ümumdünya Səhiyyə Təşkilatının rəhbərliyi altında edilən səylərə toxunuldu və beynəlxalq əməkdaşlığın bilik mübadiləsi və ən yaxşı təcrübələri tətbiq etməklə pandemiyanı idarə etmək, aradan qaldırmaq və məğlub etmək çağırışı ilə başa çatdı. Bundan əlavə, Azərbaycan Prezidenti İlham Əliyevin təşəbbüsü ilə hazırda Prezidentliyini həyata keçirən Türkdilli Dövlətlərin Əməkdaşlıq Şurasının Zirvə toplantısı keçirildi. Bu Sammit, həmçinin üzv ölkələrdə COVID-19-u məğlub etmək üçün davam edən səylərə həsr olunmuşdur. Türk Şurası COVİD-19-la bağlı ilk online konfrans keçirən təşkilat oldu. Dövlət başçıları arasında fikir mübadiləsi bu təşkilat daxilində səmərəli əməkdaşlığa yaxşı bir yol açdı.

Azərbaycan Respublikasının Prezidenti və Qoşulmama Hərəkatına rəhbərlik edən cənab İlham Əliyev BMT-nin Baş Katibi Antonio Quterreşə dövlət və hökümət başçıların səviyyəsində BMT Baş Assambleyasının Xüsusi sessiyasının keçirilməsi təklifi ilə çıxış edib. COVİD-19-la mübarizədə qlobal həmrəyliyin gücləndirməsi istiqamətində mayın 28-də BMT Baş Katibi üzv ölkələrə bu təşəbbüsə öz münasibətlərini bildirməyə çağırıb. Rəsmi məlumatlara görə 130-dan çox ölkə BMT-nin Baş Katibi ofisinə Azərbaycan Prezidentinin və Qoşulmama Hərəkatın Sədrinin təşəbüsünü dəstəklədikləri barədə məlumat göndəriblər.

"Hamımız bir yerdəyik" beynəlxalq səylərinə qoşulmaqda olan Azərbaycan 30-dan çox ölkəyə və 3 beynəlxalq təşkilata dezinfeksiyaedici maddələr, qoruyucu vasitələr, tibbi maskalar və digər zəruri avadanlıqlar göndərərək kömək etmişdir. Azərbaycan koronavirusla mübarizə üçün ÜST-ə 5 milyon ABŞ dolları və Qoşulmama Hərəkatının üzv ölkələrindən ən çox yardıma ehtiyacı olan ölkələrə dəstək vermək üçün əlavə 5 milyon ABŞ dolları, bir çox ölkələrə humanitar yardım göndərdi.

Parlament üzvləri olaraq, Azərbaycan Milli Məclisinin səylərini qeyd etmək istərdik. COVID-19 pandemiyasının başlamasından bu günə qədər Parlament 20 plenar iclas keçirdi və pandemiyanın nəticələrini yüngülləşdirmək üçün bir sıra təcili qərarlar qəbul etdi.

Bu çətin dövrdə Azərbaycanın Heydər Əliyev Fondu dövlət tərəfindən həyata keçirilən tədbirləri dəstəkləmək məqsədi ilə bir çox sosial aksiyalara başlamışdır. Bundan əlavə, Fond pandemiyanın aradan qaldırılması üçün ÜST ilə nümunəvi əməkdaşlıq nümayiş etdirir.

Qlobal COVID-19 pandemiyası dünyanın bütün ölkələrinə mənfi təsir göstərir. Bu həlledici dövrdə əməkdaşlığın zəruri olduğuna dərindən inanırıq. Virusla mübarizədə qazanılan təcrübə, məlumat və elmi bilikləri bölüşmək və ehtiyacı olan ölkələrə yardım göstərmək vacibdir. Yalnız qarşılıqlı dəstək, özünü qoruma və birgə səylərlə COVID-19-a qalib gələ bilərik. Biz birlikdə işləməklə böyük hədəflərə xidmət edən dövlətlər olduğumuzu nümayiş etdirməliyik.

COVİD-19 pandemiyasının hələdə davam etməsi, bununla bağlı bu qərqin dövrlərdə beynəlxalq əməkdaşlığın gücləndirilməsinin vacib olduğunu bir daha göstərir. Biz inanırıq ki, bugünki müzakirələr COVİD-19-la mübarizədə beynəlxalq səylərin daha da gücləndirilməsinə öz müsbət töhvələrini göstərəcək. Mən vurğulamaq istəyirəm ki, Prezident İlham Əliyevin “Biz bir yerdə güclüyük” çağırışı indiki vəziyətdə çox aktualdır. Biz COVİD-19 təhdidinə qarşı səylərimizi birləşdirməklə və beynəlxalq həmrəliyi gücləndirməklə daha efektli mübarizə apara bilərik. Ancaq birlikdə çalışaraq biz böyük məqsədlərə nail ola biləcəyimizi nümayiş etdirə bilərik".

Bir sıra ölkələrin nümayəndə heyətlərinin çıxışlarından sonra bəyanatın geniş müzakirəsi olub, bir sıra təkliflər irəli sürülüb. Azərbaycanın Asiya Parlament Assambleyasındakı nümayəndə heyətinin rəhbəri Q.Paşayeva qəbul ediləcək bəyanatla bağlı bir sıra önəmli təkliflərlə çıxış edib.

image description image description