Ombudsmanın əməkdaşları - FHN-in hərbi hissəsinə baxış keçirdi

Ombudsman Aparatının əməkdaşları Fəzail Həsənov və Murad Babayev Azərbaycan Respublikasının Fövqəladə Hallar Nazirliyinin Mülki Müdafiə Qoşunlarının Hüquq şöbəsinin rəisi Elşad İbrahimovla birgə Türkan qəsəbəsi ərazisində yerləşən N saylı hərbi hissəyə baş çəkərək, şəxsi heyətin məişət şəraiti ilə tanış olub, hüquqi maarifləndirmə işi aparıblar.

AzNews.az xəbər verir ki, aparatın əməkdaşları tərəfindən hərbi hissənin bütün obyektlərinə, o cümlədən əsgər yataqxanasına, yeməkxanaya, mətbəxə, tibb məntəqəsinə, görüş yerinə, məişət otaqlarına baxış keçirilmiş, hərbi qulluqçuların məişət şəraiti öyrənilib.

Hərbi qulluqçularla rəftar, qidanın və müalicə işinin keyfiyyəti, asudə vaxtın keçirilməsi üçün yaradılan şərait, həmçinin şəxsi heyətlə vətənpərvərlik və təlim-tərbiyə sahəsində aparılan iş müsbət qiymətləndirilib.

Hərbi qulluqçularla görüş zamanı bildirilib ki, dövlətimiz tərəfindən ölkə əhalisinin və ərazilərin təhlükəsizliyinin təminatı, maddi və mədəni sərvətlərimizin mühafizəsi, vətəndaşlarımızın firavan həyat və fəaliyyətinin təmin edilməsi kimi şərəfli vəzifənin yerinə yetirilməsi məqsədi ilə hərbi hissənin şəxsi heyəti üçün lazımi şərait yaradılıb.

Həmçinin qeyd olunmalıdır ki, hərbi şəhərcikdə zabit, gizir və müddətdən artıq xidmətdə olan hərbi qulluqçular üçün hər birində 40 mənzil olmaqla iki beşmərtəbəli yaşayış binasının tikintisi başa çatdırılıb, bütün mənzillər mətbəx, yataq və digər mebellər və avadanlıqlarla tam təmin edilib. Yaxın günlərdə mənzillərin hərbi qulluqçuların istifadələrinə verilməsi gözlənilir.