Sahibkarlarla icra başçısının qarşıdurması davam edir

Gədəbəyli sahibkarların icra başçısı ilə qalmaqalı davam edir. Növbəti dəfə mediaya müraciət edən sahibkarlar bütün dövlət qurumlarının onların xeyrinə qərar çıxardığını, lakin icra başçısının bu qərarlara sayğısızlıq göstərdiyini bildirirlər.

Sahibkarlar adından verilən xəbərdə bildirilir ki, onlara məxsus obyektlərin icra hakimiyyəti tərəfindən heç bir əsas olmadan sökülməsi nə hüquqa, nə də insanlığa sığır. Bunlar bir yana, indiyədək bütün aidiyyəti qurumlara edilən şikayətlər, hətta məhkəmə qərarları da icra edilmir.

Şikayətçilərdən Əliyev Oqtay Qara oğlu deyir ki, ona məxsus olan 38,5 kvm-lik obyekt 12 fevral 2015-ci il tarixdə Gədəbəy rayonunun icra başçısı Ramiz Yediyarovun verdiyi qanunsuz tapşırıq əsasında sökülüb. "Sahibkarlıq fəaliyyətimi genişləndirmək üçün, hələ 2011-ci ildə şəxsi mülkiyyətimdə olan mağazanı "Rabitə Bank"a girov qoyaraq 50 000 manat məbləğində kredit götürmüşdüm. Elə ki, mağaza yerlə-yeksan olundu, həmin vaxtdan həm sahibkarlıq fəaliyyətim bitdi, həm də "Rabitə Bank"la üz-üzə qaldım. Mən haqqımı tələb edərkən Ramiz Yediyarov mənə heç bir qanuni əsas olmadan 15 sutka həbs veridirdi. Bu günə kimi də mənə müxtəlif hədə-qorxular gəlirlər".

Sahibkar Vaqif Səfərov da icra başçısının qurbanı olduğunu deyir. Əslən Gədəbəy şəhər sakini olan Vaqif Səfərovun şəxsi mülkiyyətində olan 2600 kvm-lik torpaq sahəsi 2013-cü ildə min-bir bəhanə ilə rayon rəhbərliyi tərəfindən ələ keçirilir. "Əvvəlcə bəhanə gətirilir ki, həmin ərazidən yüksək gərginlikli elektrik xətti keçdiyindən 2600 kvm-lik torpaq sahəsində hər hansı tikinti işləri aparmaq olmaz. Amma, çox keçmədi ki, ələ keçirilən torpaq sahəsində heç bir standarta cavab verməyən böyük ticarət mərkəzi inşa edildi".

Vaqif Səfərovun sözlərinə görə o, problemlə bağlı bütün qurumlara yazılı müraciət edib.

Digər sahibkar Əliyev Oqtay İbrahim oğlu deyir ki, Qalakənd meşə zolağında inşa etdirdiyi turizm obyekti bir ay ərzində üç dəfə – 2014-cü ilin iyul ayının 11-də, 23-də və 29-da darmadağın etdirilib: "Mənə məxsus obyekt, Ekologiya və Təbii Sərvətlər Nazirliyinin balansına aid ərazidə inşa olunan vaxt, rayon icra hakimiyyətinin vəzifəli şəxsləri ərazidə olublar. Onlar inşa olunan obyektə xeyir-dua da verdirlər. Təqribən bir il sonra atılan addımlar isə icra hakimiyyəti başçısının xəyanətkar mövqeyini ortaya qoydu".

O.Əliyevin sözlərinə görə, 170 min manata başa gələn həmin obyektin uçurulması ilə bağlı Gəncə İnzibati-İqtisadi Məhkəməsinə müraciət edib. Məhkəmə işi araşdırıb və xüsusi ekspertizanın rəyini nəzərə alaraq təsdiq edib ki, Əliyev Oqtay İbrahim oğluna məxsus həmin turizm obyekti həqiqətən də Gədəbəy Rayon İcra Hakimiyyəti tərəfindən əsassız olaraq sökülüb. Nəticədə, məhkəmə bununla bağlı 16 fevral 2015-ci il tarixli Qərar qəbul edib. Azərbaycan Respubliksaının İnzibati Prosessual Məcəlləsinin 68, 69, 75 və 85-ci maddələrinin rəhbər tutulduğu Qərarda bildirilir: Cavabdeh Gədəbəy Rayon İcra Hakimiyyətindən 66 626 manat tutulub iddiaçı Əliyev Oqtay İbrahim oğlunun xeyrinə ödənilsin. Lakin Gədəbəy RİH bugünədək nəinki bu qərarı icra edib, heç məhkəməni də saymır.

Digər gədəbəyli sahibkar Qasım Məmmədov isə tam qanuni şəkildə ona məxsus olan 51 kvadrat metr olan çayxananın qeyri-qanuni olaraq sökülməsindən şikayətçidir.

Qafqazinfo.az