"Medeya Evripidə qarşı" tamaşası təqdim olunacaq

Tamaşanın səhnəqrafiya işi Lela Peradzeyə məxsusdur

Aprelin 5-də saat 19:00-da Akademik Milli Dram Teatrında “Medeya Evripidə qarşı” tamaşası təqdim olunacaq. Gürcüstanın Mesxeti (Axalçixi) Peşəkar Dövlət Dram Teatrında Janri Kaşianın eyniadlı pyesi əsasında hazırlanan tamaşanın rejissoru Georgi Şalutaşvilidir.

AzNews.az Mədəniyyət Nazirliyinin saytına istinadən bildirir ki, Tamaşanın səhnəqrafiya işi Lela Peradzeyə, geyim üzrə rəssam işi Nana Koranaşviliyə, xoreoqrafiya Tamta Tavdişviliyə məxsusdur.

Bəstəkar Aleksi Turiaşvili, səhnə hərəkəti üzrə rəssam Cuna Tumanişvilidir.

Qeyd edək ki, tamaşa Azərbaycan Teatr Xadimləri İttifaqı ilə Gürcüstan Teatr Cəmiyyəti arasında 2018-ci ilin noyabrın 14-də imzalanan Memorandum çərçivəsində təqdim olunacaq.

Azərbaycan və Gürcüstan respublikaları arasında mədəni əlaqələrin inkişaf etdirilməsinə xidmət edən Memorandum gələcək faydalı teatr əməkdaşlığına töhfə verəcək mühüm razılaşmadır.

İttifaqlararası Memorandum çərçivəsində keçiriləcək daha bir tədbirdə – Azərbaycanın Gəncə Dövlət Dram Teatrı ilə Gürcüstanın Ozurgeti Dövlət Teatrı arasında qarşılıqlı əməkdaşlıq barədə Memorandum imzalanacaq. Mərasim aprelin 5-də saat 12.00-da Azərbaycan Teatr Xadimləri İttifaqında baş tutacaq.

Cavidan Mirzəzadə

AzNews.az