Namazdan qayıdan şəxs vəhşicəsinə döyülüb

Bu gün səhər saatlarında Müşfiqabad qəsəbəsində vəhhabi təriqətinə məxsus idmançı görkəmli şəxs, məscidə namaz qılmaq üçün gələn Mövsümov Ruslan Əliəsgər oğlunu vəhşicəsinə döyüb.
Bu barədə ANS PRESS-ə zərərçəkmiş şəxsin özü məlumat verib. Ruslan Mövsümovun sözlərinə görə, hadisə sübh namazından qayıdarkən baş verib:

"Sübh namazını qıldıqdan sonra evə gedirdim. Yolda qabağımı kəsən şəxs mənə dedi ki, nəyə görə mənə çiyin atırsan? Bu işin özünün gördüyünü xatırladanda, isə bildirdi ki, gəl keçək qırağa səninlə söhbətim var, dava eləmək istəmirəm. Qırağa çəkiləndən sonra paltarını soyundu və bildirdi ki, mən səninlə dava eləmək istəyirəm. Həm idmançı olması, həm də ki, cüssə baxımından böyük olmasına görə mənə zərbə vuraraq yerə yıxdı və sonra üzərimə düşərək mənə ciddi şəkildə xəsarət yetirdi".

Ona zərbə yetirən şəxsi üzdən tanıdığını, Müşfiqabadda yerləşən məscidə gələn vəhhabilərlə birgə oturub-durduğunu söyləyən zərərçəkmiş şəxs analoji hadisənin daha əvvəl də baş verdiyini deyib: "Bir neçə dəfə məsciddən çıxanda mənə çiyin vurmuşdu. İndi də gəlib deyir ki, sən mənə çiyin vurmusan. Ümumiyyətlə bundan əvvəl də məsciddə kifayət qədər mübahisələr düşüb".

"Orada olan vəhhabilər məscidə ibadətə gələn digər məzhəb üzvlərinin özlərinə və paltarlarına qarşı hörmətsizlik edirlər. Bir neçə dəfə olub ki, paltarlarımızı götürüb başqa yerə tullayanda etirazımı bildirmişəm".

Olayla bağlı zərərçəkmiş şəxs, Daxili İşlər Nazirliyinə məlumat verib.

DİN-nin mətbuat xidmətindən ANS PRESS-ə verilən məlumata görə, məsələ ilə əlaqədar araşdırma aparılır.

Qeyd edək ki, Ruslan Mövsumov hal-hazırda 1 saylı şəhər xəstəxanasına yerləşdirilib.



AzNews.az