Şirkətlərin sayında 8% artım nəyin göstəricisidir? - ŞƏRH

2025-ci ilin iyul ayının 1-nə olan məlumata əsasən, Azərbaycanda vergi ödəyicilərinin sayı 1 milyon 630 min 743-ə çatıb. Onların 86,9 faizi fiziki şəxslər, 13,1 faizi isə hüquqi şəxslər və digər təşkilatlardır. Son bir il ərzində hüquqi şəxslərin sayında 7,7 faiz, fiziki şəxslərin sayında isə 4,4 faiz artım qeydə alınıb. Qeydiyyata alınan kommersiya hüquqi şəxslərin 91,7 faizi məhdud məsuliyyətli cəmiyyətlərdir və hazırda ölkədə 197 minə yaxın kommersiya qurumu fəaliyyət göstərir. Cari ilin yanvar-iyun aylarında 6 min 814 kommersiya qurumu dövlət qeydiyyatından keçib. Onların 88,9 faizi yerli, 11,1 faizi isə xarici investisiya hesabına yaradılıb. Eyni dövrdə kommersiya qurumlarının 85,3 faizi elektron qaydada qeydiyyatdan keçib, bu isə müasir texnoloji həllərin biznes proseslərinə inteqrasiyasının sürətləndiyini göstərir.

Aznews.az şərh edir ki, vergi ödəyicilərinin sayındakı bu artım Azərbaycanda iqtisadi fəallığın və bazarın institusional dayanıqlığının göstəricisidir. MMC-lərin üstünlük təşkil etməsi, ölkədə çevik, kiçik və orta biznes modellərinə üstünlük verildiyini göstərir. Bu, həm də yeni yaranan sahibkarlıq təşəbbüslərinin strukturunda çevik idarəetmə və bazar ehtiyaclarına tez reaksiya verə bilən subyektlərin çoxluğunu təsdiqləyir.

İnvestisiya mənşəyinə görə, yeni kommersiya qurumlarının 11,1 faizinin xarici kapitalla yaradılması beynəlxalq investorların Azərbaycan bazarına marağının davam etdiyini nümayiş etdirir. Xarici kapitallı şirkətlərin payı regionun iqtisadi açıq siyasətinə, hüquqi şəffaflıq və uzunmüddətli sabitliyə əsaslanır. Bu cür iştirak biznesin strukturunda yeni texnologiya və idarəetmə təcrübələrinin yayılmasına, bazarda rəqabətin və innovativliyin artmasına səbəb olur.

Elektron qeydiyyatın payı, xüsusilə yerli MMC-lər arasında 96,6 faizə yaxınlaşır. Bu, bir tərəfdən dövlətin rəqəmsal infrastrukturunun gücləndirilməsi siyasətinin nəticəsidir, digər tərəfdən sahibkarlar üçün qeydiyyat prosedurlarında operativliyin və şəffaflığın artırılmasını təmin edir. Müasir texnologiyaların tətbiqi biznesin ilkin mərhələsində vaxt və resurs qənaətinə şərait yaradır, eyni zamanda daha şəffaf və izlenəbilən hüquqi mühit formalaşdırır.

Hazırda Azərbaycanda iqtisadiyyatın şaxələndirilməsi və regionların inkişafı üçün həyata keçirilən tədbirlər regionlarda da kommersiya qurumlarının yaranma tempinin yüksəlməsinə səbəb olur. Müxtəlif sahələrdə yeni müəssisələrin təşəbbüs göstərməsi, əmək bazarında yeni iş yerlərinin yaranması və yerli məhsul istehsalının artması üçün əlavə imkanlar yaradır. Bu tendensiya təkcə iqtisadiyyata deyil, sosial sahəyə də təsir edir, regionlar arasında balanslaşdırılmış inkişafı və əhalinin iqtisadi aktivliyini artırır.

Beynəlxalq təcrübəyə əsaslansaq, iqtisadi dayanıqlıq üçün bazar iştirakçılarının və vergi ödəyicilərinin geniş spektrdə olması dövlət büdcəsinin sabitliyini və sosial proqramların icrasını gücləndirir. Azərbaycanda da bu tendensiya müşahidə olunur və iqtisadi siyasətin real göstəricisi kimi çıxış edir.

Statistik məlumatlar göstərir ki, ölkədə sahibkarlıq təşəbbüsləri və iqtisadi aktivlik yüksək olaraq qalır. Müxtəlif səviyyədə yeni bizneslərin yaranması və dövlətin institusional dəstəyi iqtisadiyyatın strukturunda çevikliyi və modern yanaşmaları gücləndirir. Bazarın bu cür dinamikası Azərbaycanın iqtisadi artım trayektoriyasına və uzunmüddətli inkişaf potensialına əsaslı töhfə verir.

Nuray,
Aznews.az