Millət vəkilimiz Qazaxıstan rəsmilərilə görüşəcək

Noyabrın 28-dən dekabrın 1-dək Qazaxıstanda "Böyük İpək Yolu" Beynəlxalq Gənclər Təşkilatının növbəti iclası keçiriləcək. İclasda iştirak etmək üçün "Böyük İpək Yolu" Beynəlxalq Gənclər Təşkilatının sədri, millət vəkili Fuad Muradovun başçılıq edəcəyi nümayəndə heyəti Astanaya səfər edəcək.

İclas zamanı təşkilatın indiyədək gördüyü işlərin hesabatı dinləniləcək, internet səhifəsinin təqdimat mərasimi keçiriləcək, yeni üzvlərin qəbulu məsələsinə baxılacaq, 2013-cü ilin Fəaliyyət Planı müzakirə olunacaq və layihələr təsdiq olunacaq.

Səfər çərçivəsində F.Muradovun Astanada Qazaxıstanın bir neçə dövlət hökumət üzvləri, o cümlədən Qazaxıstan Parlamentində görüşlər keçirməsi nəzərdə tutulub.

Xatırladaq ki, millət vəkili Fuad Muradov 2012-ci il iyunun 28-də "Böyük İpək Yolu" Beynəlxalq Gənclər Təşkilatının sədri seçilib.

Vasif Həsənli
AzNews.az