Siyavuş Novruzov: “Heç Barak Obama İsa Qəmbər kimi etməyib”

"Lənkəranda 20 müsavatçı ilə görüşmək üçün Bakıdan özü ilə 150 nəfər yığıb aparan İsa Qəmbərin məqsədi görüş yox, bölgədə şou yaratmaqdır. Buna görə onun Lənkəranda görüşü alınmır".

Bu açıqlamanı APA-ya hakim Yeni Azərbaycan Partiyasının (YAP) icra katibinin müavini, deputat Siyavuş Novruzov verib. Onun sözlərinə görə, İsa Qəmbərin bu hərəkəti hakimiyyət tərəfindən başa düşülmür: "Təsəvvür edin, 35 avtomobil, özü də karvan şəkilində Bakıdan Cəlilabada qədər yol hərəkəti qaydalarını poza-poza bütün yol boyu şou göstəriblər. Yolboyu ətrafda yaşayan sakinlərin rahatlıqlarını və yaşayış hüquqlarını pozublar. Rayon insanlarıdır, biri bazara gedir, biri harasa xəstə aparır. Onlar üçün İsa Qəmbərin hara getməsi maraqlı deyil. Məqsədi sakit və səmimi görüş olan adama bu həngamə nə üçün lazımdır? Heç Barak Obama seçkiqabağı İsa Qəmbər kimi etmir. Obama öz kampaniyalarına ən uzağı 6-8 adamla gedir. Daha İsa Qəmbər kimi başına 150-160 nəfərlik dəstə yığıb bölgələrə hücum çəkmir".

YAP rəsmisi deyib ki, İsa Qəmbərin məqsədi Lənkəranda sosial bazası olmadığına görə Bakıdan özləri ilə çoxlu adam yığıb aparıblar: "QHT-lərdən, İctimai Palatadan, oradan- burdan qarşılarına kim çıxıbsa, maşınlara yığıb Lənkərana üz tutublar. Başına yığdıqları bu adamlarla gedib Lənkəranda görüş keçirməyin nə mənası var? Elə o görüşü Bakıda da keçirmək olar".

S. Novruzov bildirir ki, İsa Qəmbərə ölkənin istənilən yerində görüş keçirmək üçün hər cür şərait yaradılıb: "Eyni zamanda Lənkəranda da yaradılıb. Lakin görünür, onun məqsədi görüş yox, hay-küy yaratmaq olub və bunun qarşısının alındığını gördükdə Cəlilabaddan geri qayıdıb. Çünki onun məqsədi Lənkəranda görüş keçirmək deyildi, buradan yığıb apardığı adamlardan ibarət bölgədə şou göstərmək idi.

S. Novruzov İsa Qəmbər və tərəfdarlarının yol boyu kafe və çayxanalarda üzləşdikləri insidentə də münasibət bildirib. Onun sözlərinə görə, həmin kafelər özəl müəssisədirlər və İsa Qəmbəri qəbul edib-etməmək onların öz işidir: "Əgər İsa Qəmbər onlar üçün arzu olunan müştəri deyilsə, buna hakimiyyət nə etsin?"

Qeyd edək ki, Müsavat Partiyasının başqanı İsa Qəmbərin ötən gün Lənkərana səfəri baş tutmayıb. Partiya başqanının korteji Göytəpə qəsəbəsi yaxınlığında Yol Patrul Xidməti postunda saxlanılıb və sənəd yoxlaması aparılıb. İ. Qəmbərin maşını və daha bir neçə avtomobil postdan buraxılıb. Onu müşayiət edən digər avtomobillər isə postdan buraxılmayıb. Müsavat başqanı gərginlik yaratmamaq üçün geri dönməyə qərar verib.

AzNews.az