Əli İnsanov Milli Şuranın namizədini dəstəkləyən BƏYANAT verib

Həbsdə olan keçmiş səhiyyə naziri Əli İnsanov Milli Şuranın prezidentliyə namizədi Cəmil Həsənlini dəstəklədiyini bəyan edib.

"9 oktyabr prezident seçkilərində Milli Şuranın irəli sürdüyü namizəd professor Cəmil Həsənlini dəstəkləməyə çağırıram. Mən onu 1990-cı ildən tanıyıram. O, təkcə Milli Şuranın deyil, iqtidardan narazı olan bütün xalqın namizədidir. Buna görə Azərbaycan xalqını Cəmil Həsənliyə səs verməyə çağırıram", – deyə İnsanovun vəkili Toğrul Babayev vasitəsilə Turan-a təqdim etdiyi bəyanatında bildirilir.

Xatırladaq ki, Ə.İnsanov 2005-ci ilin oktyabrında dövlət çevrilişinə cəhd ittihamı ilə həbs edilib. Sonradan iqtisadi cinayətlərə görə 11 il azadlıqdan məhrumetmə cəzasına məhkum edilib. İyunun 10-da Avropa İnsan Hüquqları Məhkəməsinin Azərbaycan məhkəmələrinin İnsanovun hüquqlarını pozması haqqında qərarı qüvvəyə minib.