• Toplum
  • 16 Yanvar 2019 15:39
  •  703

Ötən il pensiya, müavinət və təqaüdlərdə artım davam edib

Əmək pensiyalarının məbləğində 7,3 faiz artım qeydə alınıb

Azərbaycan Respublikası Prezidenti cənab İlham Əliyevin əhalinin sosial müdafiəsinin gücləndirilməsinə xüsusi qayğısı, dövlət başçısı tərəfindən bu məqsədlə imzalanan Fərman və Sərəncamlar nəticəsində 2018-ci ildə də sosial təminat sisteminin bütün istiqamətləri üzrə ödənişlərdə artım tempi davam edib

AzNews.az xəbər verir ki, ötən il əmək pensiyalarının orta aylıq məbləğində 6,8 faiz, o cümlədən yaşa görə əmək pensiyalarının məbləğində 7,3 faiz artım qeydə alınıb. Sosial müavinətlərin və Azərbaycan Respublikası Prezidentinin təqaüdlərinin məbləği isə 10 faiz artıb. Eyni zamanda, Azərbaycan Respublikası Prezidentinin Azərbaycanın Milli Qəhrəmanları üçün təqaüdünün məbləği 15 faiz artırılaraq 1500 manata çatdırılıb.

Qeyd olunan istiqamətlər üzrə ayrılan vəsaitlərdə də artım özünü göstərib: 2018-ci ildə əmək pensiyaları üzrə ödənişlərə əvvəlki illə müqayisədə 234,7 mln. manat çox olmaqla 3 523,2 mln. manat, sosial müavinət və təqaüdlərə isə 58,2 mln. manat çox olmaqla 428,8 mln. manat vəsait xərclənib.

Səidə Nurməmmədli
AzNews.az

image description