Bakıda Cəlil Məmmədquluzadənin heykəli üçün təklif edilən yer açıqlandı

Anar: Mən istərdim ki, onun heykəli Mirzə Ələkbər Sabirin heykəlinin yanında qoyulsun

“Mədəniyyət adamlarının Azərbaycan Prezidenti İlham Əliyevlə görüşündə təklif etdim ki, Bakıda Cəlil Məmmədquluzadəyə heykəl ucaldılsın”.

Bunu Azərbaycan Milli Elmlər Akademiyası (AMEA) Nizami Gəncəvi adına Ədəbiyyat İnstitutunda keçirilən “Cəlil Məmmədquluzadə 150 il - məqalələr, esselər, müsahibələr, şeirlər” kitabının təqdimat mərasimində Azərbaycan Yazıçılar Birliyinin (AYB) sədri, Xalq yazıçısı Anar deyib.

O bildirib ki, heykəlin ucaldılması prosesində Bakı Şəhər İcra Hakimiyyəti və Mədəniyyət Nazirliyi ilə yanaşı, AYB və AMEA da yaxından iştirak etməlidirlər.

“Biz çalışmalıyıq ki, Mirzə Cəlilin adına layiq heykəl ucaldılsın. Mən istərdim ki, onun heykəli Mirzə Ələkbər Sabirin heykəlinin yanında qoyulsun. Onlar sağlıqlarında da bir yerdə idilər, indi də bir yerdə olsunlar. Düşünürəm ki, bu, Mirzə Cəlilin xatirəsinə çox böyük hədiyyə olar”, - deyə Anar vurğulayıb.

Qeyd edək ki, bu ilin əvvəlində Prezident İlham Əliyevin və Birinci vitse-prezident, Heydər Əliyev Fondunun prezidenti Mehriban Əliyevanın mədəniyyət xadimləri ilə görüşündə AYB sədri, Xalq yazıçısı Anar Bakıda Cəlil Məmmədquluzadənin heykəlinin ucaldılması təklifi ilə çıxış etmişdi.

AzNews.az