Avropa Oyunları yenidən Bakıda keçiriləcək? - Nazirlikdən açıqlama

“Azərbaycanın 2024-cü il Yay Olimpiya Oyunlarına ev sahibliyi etmək üçün müraciət etməsi ilə bağlı məlumatlar yanlışdır".

AzNews.az xəbər verir ki, Gənclər və İdman Nazirliyinin mətbuat xidmətinin rəhbəri Səmayə Məmmədova ans press-ə açıqlamasında belə deyib.

Onun sözlərinə görə, Azərbaycan 2024-cü il Yay Olimpiya Oyunlarına ev sahibliyi etmək üçün namizədliyini hələki irəli sürməyib. Ola bilsin ki, cənab prezident sentyabr ayına qədər buna qərar versin. "Amma hələki bununla bağlı ölkəmiz tərəfindən Beynəlxalq Olimpiya Komitəsi müraciət edilməyib".

Qeyd edək ki, artıq bəzi mənbələr bu mötəbər tədbirin ölkəmizdə keçiriləcəyini yazır. Hətta Vikipediyanın Azərbaycan dili versiyasında Bakının adı 2024-ci il Yay Olimpiya Oyunlarını keçirməyə iddialı şəhərlərin siyahıda yer alıb.

Azərbaycanın gənclər və idman naziri Azad Rəhimov Bakının 2024-cü il Yay Olimpiya Oyunlarına ev sahibliyi etməsi üçün müraciətlə bağlı son qərarın dövlət başçısı tərəfindən veriləcəyini bildirmişdi.

Macarıstan Milli Olimpiya Komitəsi Budapeşt şəhərinin 2024-cü il Yay Olimpiya Oyunlarına keçirmək üçün namizədliyini irəli sürüb. Bundan öncə Oyunlara ev sahibliyi etmək üçün İtaliyanın Roma, Almaniyanın Hamburq, ABŞ-in Boston və Fransanın Paris şəhərləri namizədliklərini irəli sürüb.

2024-cü il Yay Olimpiya Oyunlarının keçirilməsi üçün namizəd ölkələrin ərizələrinin rəsmi qəbulu yanvarın 15-dən başlayıb və son tarix 2015-ci il sentyabrın 15-dir. Beynəlxalq Olimpiya Komitəsi 2017-ci ildə Limada təşkilatın 130-cu sessiyasında Olimpiya Oyunlarına ev sahibliyi edəcək şəhəri elan edəcək.