Transxəzər Asiya ilə Avropa arasında ən sərfəli dəhlizdir - Çin KİV-ləri

Çin kütləvi informasiya vasitələri rəsmi şəxslərdən və iş adamlarından ibarət Azərbaycan nümayəndə heyətinin bu ölkəyə səfərini və “Bir kəmər, bir yol” təşəbbüsünün reallaşmasında “Transxəzər Şərq-Qərb Ticarət və Tranzit Dəhlizinin rolu” mövzusunda beynəlxalq konfransı diqqətdə saxlayıb.

"Azərtac" xəbər verir ki, ölkənin əsas media qurumlarından Çin Mərkəzi Televiziyası (CCTV), milli xəbər agentliyi Sinxua, rəsmi “Renmin Ribao” qəzeti, Çin Beynəlxalq Radiosu, Dövlət Şurası İnformasiya Ofisinin xəbər portalı, “China Daily” qəzeti, ölkənin digər populyar xəbər saytları mövzu ilə bağlı Çin, ingilis və rus dillərində dəfələrlə reportajlar və xəbərlər, geniş məqalələr hazırlayıblar. Materiallarda iki ölkə arasında müxtəlif sahələrdə əlaqələrin tarixindən, hazırkı inkişaf səviyyəsindən, gələcək əməkdaşlıq istiqamətlərindən, Azərbaycanın qədim İpək Yolunun bərpası, o cümlədən Çinin “Bir kəmər, bir yol” strategiyasının həyata keçirilməsinə verdiyi töhfələrdən söz açılıb.

Qeyd olunub ki, Transxəzər Asiya ilə Avropa arasında ən sərfəli dəhliz olmaqla yanaşı, bu istiqamətdə yükdaşımalar dəhlizin keçdiyi ölkələrin əməkdaşlığına və iqtisadi inkişafına müsbət təsir göstərəcək. “Dəhlizin flaqmanı olan Bakı-Tbilisi-Qars dəmir yolu xətti ötən ilin oktyabrında istifadəyə verilib. Bu dəmir yolu Azərbaycan, Gürcüstan və Türkiyəni birləşdirməklə, Bakını Avropa və Çin arasında yük və sərnişin daşımalarında qovşağa çevirir”, - deyə Çin mətbuatı yazır.

Qeyd edək ki, iqtisadiyyat naziri Şahin Mustafayevin rəhbərlik etdiyi, Azərbaycanın Çindəki səfiri Əkrəm Zeynallı, “Azərbaycan Dəmir Yolları” QSC-nin sədri Cavid Qurbanov, “Azərbaycan Xəzər Dəniz Gəmiçiliyi” QSC-nin sədri Rauf Vəliyev, “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov, Qaradağ Rayon İcra Hakimiyyətinin başçısı Süleyman Mikayılov, Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədovun və başqalarının daxil olduğu nümayəndə heyəti fevralın 5-7-də Çində səfərdə olub.

Səfər çərçivəsində Çinin nəqliyyat naziri Li Siaopan, kommersiya nazirinin müavini, beynəlxalq ticarət məsələləri üzrə nümayəndəsi Fu Ciyin, İpək Yolu Fondunun prezidenti Vanq Yanci, İpək Yolu Beynəlxalq Ticarət Palatasının sədri Lu Ciancun, Şaansi vilayətinin qubernatoru Liu Goucun ilə görüşlər keçirilib, “Bir kəmər, bir yol” təşəbbüsünün reallaşmasında “Transxəzər Şərq-Qərb Ticarət və Tranzit Dəhlizinin rolu” mövzusunda beynəlxalq konfransı ilə yanaşı, Pekində Azərbaycan-Çin biznes forumu, Sianda Azərbaycanın investisiya mühiti və tranzit potensialının təqdimatı təşkil edilib, ölkəmizin Çindəki Ticarət Nümayəndəliyinin ofisinin rəsmi açılışı olub.

AzNews.az