“Ziyad Səmədzadə dedi ki, mən elə bir fikir səsləndirməmişəm” - Deputat

Milli Məclisin İqtisadi siyasət, sahibkarlıq və sənaye komitəsinin sədri Ziyad Səmədzadənin kənd təsərrüfatı ilə məşğul olanlara əlavə vergi tətbiq edilməsi ilə bağlı səsləndirdiyi fikir cəmiyyətdə böyük narazılıq yaradıb.

AzNews.az xəbər verir ki, Vergilər Nazirliyinin təşkil etdiyi "Vergilər, şəffalıq, inkişaf" adlı konfransda çıxış edən deputat, Azərbaycan əhalisinin 35-36 %-nin kənd təsərrüfatı sahəsində çalışdığını bildirib: “Vergi yükünü yox, vergi ödəyicilərinin sayını artırmaq lazımdır. Azərbaycanda əhalinin 35-36%-i kənd təsərrüfatı sahəsində çalışır. Biz də bu sahəni vergidən azad etmişik. Onların vergiyə cəlb edilməsi sahəsində müəyyən addımlar atmalıyıq".

Milli Məclisin deputatı Vahid Əhmədov AzNews.az-a açıqlamasında həmkarı Ziyad Səmədzadənin fikirlərinin müzakirə edildiyini qeyd edib:

“Bu gün iclasda həmin məsələ müzakirə edildi. Ziyad Səmədzadə dedi ki, mən elə bir fikir səsləndirməmişəm. O, dedi ki, Prezident kənd təsərrüfatına böyük diqqət yetirir. Həmişə onlara güzəştlər edir. 2017-ci ildə də bu güzəstlər tətbiq olunub. Fermerlər yalnız torpaq vergisi verir. Ona görə həmin verginin ləğvindən söhbət gedə bilməz. Yəni biz istehsalatı artırmaq və onun sahələrini genişləndirmək istəyiriksə, fermerlərə əlavə güzəştlər edib, dotasiyalar veririk. Elə bunun sayəsində 2017-ci ildə kənd təsərrüfatı məhsullarının ixracı artıb. Ziyad Səmədzadə kifayət qədər təcrübəli insandır. Ola bilər ki, onu düz başa düşməyiblər. İnanmıram ki, Səmədzadə elə bir fikir səsləndirsin”.

Vahid Əhmədov vergi bazasını genişləndirməyin vacib olduğunu vurğulayıb: “Amma konkret kənd təsərrrüfatı işi ilə məşğul olanlara əlavə vergi tətbiq etmək olmaz”.

Bahar RÜSTƏMLİ
AzNews.az