Gürcü müxalifəti parçalandı - Bakradze yenə getdi

Avropa Gürcüstanı Partiyası Salome Zurabişvilinin inauqurasiyası günü – 16 dekabrda müxalifətin təşkil etdiyi etiraz aksiyasına qatılmaqdan imtina edib.

Bunu jurnalistlərə açıqlamasında partiyanın deputatı Giqa Bokeriya deyib.

“Aksiyalarda iştirak etməyəcəyik. Gərək, ağıllı hərəkət edək. Biz vətəndaşlarımızda saxta gözləntilər yaratmamalıyıq. Avropa Gürcüstanı seçki sisteminin dəyişdirilməsinə və beynəlxalq tərəfdaşları tərəfindən legitim təzyiqlərin səfərbərliyinə diqqətini yönəldəcək”, – deyə o bildirib.

Qeyd edək ki, Avropa Gürcüstanı Partiyası son prezident seçkisində David Bakradzenin namizədliyini irəli sürmüşdü. 10%-dən çox səs toplayan Bakradze ikinci turda müxalifətin vahid namizədi Qriqol Vaşadzeni dəstəkləmişdi. Partiya həmçinin seçkidən dərhal sonra müxalifətin digər nümayəndələri ilə birgə etiraz aksiyalarına qoşulacağını bildirmiş və Tiflisdəki aksiyalarda iştirak etmişdi.

Avropa Gürcüstanı Partiyası 2015-ci il parlament seçkisindən sonra yaranıb. Partiyanın yaranmasında həmin dövrdə Vahid Milli Hərəkat Partiyasının elitası hesab edilən siyasətçilər, xüsusilə, Giqa Bokeriya və David Bakradze böyük rol oynayıb. Bu siyasətçilər partiyadan Saakaşvilinin Vahid Milli Hərəkatın lideri vəzifəsində qalmasına etiraz etdikləri üçün uzaqlaşıblar.

Bokeriya və Bakradze ilə bərabər Vahid Milli Hərəkatı onlarla şəxs tərk edib. Nəticədə Vahid Milli Hərəkatın parlamentdəki fraksiyasında da parçalanma yaranıb. Bunun sayəsində Vahid Milli Hərəkatın parlamentdəki deputatlarının sayı altıya enib və partiya parlamentdə ikinci ən böyük güc statusunu Avropa Gürcüstanı Partiyasına verməli olub.

Saakaşvili indiyə qədər bu partiyanın yaranmasını Bidzina İvanişvilinin oyunu adlandırır.(axar.az)

© AzNews.az