50 milyon dollar borcu olan iş adamının həbs müddəti uzadıldı

“Azərbaycan Beynəlxalq Bankı” ASC-dən kredit götürərək qaytarmamaqda günahlandırılan “City Developer” MMC-nin direktoru Ratmir Bəkirov barəsində seçilmiş həbs qətimkan tədbirinin müddəti uzadılıb.


AzNews.az report-a istinadən xəbər verir ki, dünən xəstəxanaya yerləşdirilmiş iş adamının işinə Nərimanov Rayon Məhkəməsində baxılıb.

Bu gün keçirilən prosesdə iş adamı şəxsən özü iştirak edib. Məhkəmə onun barəsində seçilmiş həbs qətimkan tədbirinin üç ay müddətinə artırılması ilə bağlı qərar qəbul edib.

O, fəaliyyətini dayandırmış "Simurq" klubunun prezidenti Anar Bəkirovun atasıdır. R.Bəkirovun "Azərbaycan Beynəlxalq Bankı" ASC-yə təxminən 50 milyon dollar borcunun olduğu bildirilir.

Ötən iki gündə 14 iş adamı barəsində seçilmiş həbs qətimkan tədbirinin müddəti üç ay uzadılıb. Saxlanılan şəxslərin hər biri barəsində Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə) maddəsi ilə cinayət işi başlanıb.

Xatırladaq ki, dünən Ratmir Bəkirovun səhhətinin pisləşdiyi və Penitensiar Xidmətin Müalicə Müəssisəsinə aparıldığı haqda məlumat yayılmışdı. Onun əməliyyatdan sonra məhkəməyə aparılacağı gözlənilirdi.