İş adamı maşın hədiyyə etdiyi əsgərlə görüşdü - FOTO

Vallah belə oğullarımız olduqca bu dövlətə heç bir zərər gəlməz

Azərbaycanlı iş adamı Fərid Novruzi “ Mersedes” avtomobilini hədiyyə etdiyi əsgərlə görüşüb.

AzNews.az xəbər verir ki, bu haqda Fərid Novruzi özü məlumat yayıb:

“Dostlar, qəhrəman qardaşım tapıldı.

Allahın işinə baxın. Öncədən onu deyim qardaşımızı Allah saxlayıb.

Demək döyüşlərdə ayağından aldığı güllə yarası səbəbi ilə xəstəxanaya yerləşdirilmişdi, lakin yarası tam sağalmadan yenə də cəbhəyə qayıtdı. Ordu rəhbərliyi halını müəyyən edib onu tam müalicəsini bitirməsi üçün evinə məzuniyyətə yolladı.

Dünən səhər, “Facebook”da bir izləyicim, əsgər qardaşımızı təsadüfən bir neçə gün öncə hospitalda gördüyünü yazdı və onun kontaktlarını göndərdi, və əlavə etdi ki, qardaş təkrar cəbhəyə yollanıb. Bir tərəfdən üzüldüm onu görmədiyimə, digər tərəfdən belə igid ilə qürur duydum. Qərara aldım ki, qardaşa yenə də zəng edib, onunla telefon vasitəsi ilə tanış olum və hədiyyəsi barəsində xəbər verim. Və nə olsa yaxşıdı?

Qardaş dedi ki, - Şəhərə gəlirəm, axşam görüşə bilərik. İnanın elə xoşbəxt idim, elə sevinirdim ki, və Əlhəmdülillah dünən axşam bir araya gəldik.

Qardaşın üzünü məlum səbəblər ilə göstərə bilmirəm, amma Hadrut hekayəsini danışanda, maşını necə gördüyünü (bu arada ürəyindəki sözləri ifadə edərkən çəkiliş edildiyini bilmirdi), nə hisslər keçirdiyini, hamsını mənimlə bölüşdü.

Və bir şey danışdı, bunu paylaşmaya bilmərəm.

Döyüş vaxtı ayağından güllə yarası alanda digər döyüş yoldaşı daha da ağır yaralanıb. Özü yaralı ola-ola yoldaşını təhlükəsiz yerə qədər öz üzərində aparıb. Yoldaşına yaralı olduğunu bildirməyib. Yolda yoldaşı deyir ki, bizi burdan sağlam çıxar və əsasda özünü qoru, zarafatla da əlavə edib ki, unutma, səni iki qapılı maşın gözləyir. Nə deyim. Vallah belə oğullarımız olduqca bu dövlətə heç bir zərər gəlməz, heç bir düşmən önümüzdə dayana bilməz. Allah igidlərimizi qorusun! Allah ordumuzu müzəffər etsin!”

Qeyd edək ki, əsgər Hadrut uğrunda gedən döyüşlərdə “iki qapılı “Mercedes” avtomobili mənim xəyalım olub” dediyi video sosial şəbəkələrdə paylaşılıb. Bundan sonra F.Novruzi əsgərə xəyal etdiyi avtomobili alıb.

Səidə

AzNews.az