Tələbələrin köçürülməsinə start verildi: Proses necə gedir?

Tələbələrin köçürülməsi üzrə elektron sənəd qəbulu elan edildi – Proses iyulun 15-dən başlayır

2025/2026-cı tədris ili üçün ali və orta ixtisas təhsili müəssisələrində təhsil alan tələbələrin köçürülməsi ilə bağlı elektron sənəd qəbulu mərhələsi elan olunub. Elm və Ali Təhsil üzrə Dövlət Agentliyinin verdiyi məlumata əsasən, müraciətlərin qəbulu 15 iyul saat 11:00-da başlayacaq və 22 iyul saat 18:00-da başa çatacaq.

Köçürülmə prosesində iştirak etmək istəyən tələbələr portal.edu.az internet ünvanında qeydiyyatdan keçərək şəxsi kabinet yaratmalı, daha sonra elektron sistemə daxil olub müraciət formasını dolduraraq təsdiqləməlidirlər.

Tələbə köçürülməsi mexanizminin elektronlaşdırılması son illər Azərbaycan təhsil sistemində həyata keçirilən rəqəmsallaşma və idarəetmədə şəffaflığın artırılması istiqamətində mühüm addımlardan biridir. Bu sistem sayəsində əvvəllər mürəkkəb və subyektiv təsirlərə açıq olan proseslər indi aydın meyarlar, mərkəzləşdirilmiş platforma və elektron nəzarət çərçivəsində həyata keçirilir. Bu isə tələbələr arasında ədalətli seçim imkanı və qərarların izlənəbilən əsaslar üzərində qurulması deməkdir.

Əldə olunan təcrübə göstərir ki, elektron köçürmə platforması həm də ictimai nəzarəti gücləndirib. Prosesin onlayn və açıq şəkildə aparılması, bölgələrarası, universitetlərarası və ixtisaslararası mobil imkanları artırıb. Tələbələr artıq daha çox seçim sərbəstliyinə malikdirlər və bu da təhsil keyfiyyətinin yüksəldilməsinə dolayı təsir göstərir.

Dünya təcrübəsində tələbə köçürmələri adətən ya akademik mübadilə proqramları (məsələn, Erasmus+, Transfer Admission) çərçivəsində, ya da universitetlərin daxili transfer qaydalarına əsasən həyata keçirilir. İnkişaf etmiş ölkələrdə bu proses daha çox kreditlərin tanınması sistemi, transkript uyğunluğu, və açıq rəqabət meyarları əsasında baş tutur. Qərb universitetlərində tələbələrin fərdi səbəblərə, təhsil performansına və gələcək karyera planlarına uyğun olaraq başqa universitetə keçmələri təbii qarşılanır və bu imkanlar texnologiyanın köməyi ilə genişləndirilir.

Azərbaycan təcrübəsində tətbiq olunan portal.edu.az platforması artıq bu beynəlxalq trendlərlə uyğunlaşmağa başlayıb. Gələcəkdə bu sistemə kredit tanınması, akademik uyğunluq və interaktiv məsləhət xidmətləri kimi imkanların da əlavə olunması, onu regionda qabaqcıl təcrübələrdən birinə çevirə bilər.

Bununla belə, köçürülmə sisteminin təkmilləşdirilməsinə də gərək var.

Fərz edək ki, Fidan adlı bir abituriyent BDU-nun Hüquq fakültəsinə daxil olmaq istəyirdi, lakin keçid balından 10 bal az toplayaraq Tarix fakültəsinə qəbul oldu. Birinci kursda akademik göstəriciləri yüksək olsa da, hazırkı qaydalara görə keçid balı şərtini ödəmədiyindən o, Hüquq fakültəsinə köçürülə bilməz. Bu, Azərbaycanda istedadlı tələbələrin, xüsusilə ilk təhsil ili ərzində göstərdikləri yüksək nəticələrə baxmayaraq, ixtisas dəyişməsində qarşılaşdıqları əsas məhdudiyyətdir.

Avropanın bir çox universitetlərində tələbələrin fakültə və ixtisas dəyişməsi daha çox akademik göstəricilərə əsaslanır və keçid balı kimi ilkin qəbul şərtləri ikinci planda saxlanılır. Belə sistemlərdə tələbələr kurs və kredit uyğunluğu, GPA və təhsil nəticələrinə görə daxili və ya universitetlərarası köçürmələr edə bilirlər. Bundan əlavə, motivasiya məktubu və ya müsahibə kimi mərhələlər tələbənin məqsəd və bacarıqlarını qiymətləndirməyə imkan verir. Azərbaycanda da bu təcrübənin tətbiqi tələbələrin potensialını daha ədalətli qiymətləndirərək təhsil sistemində çevikliyi və şəffaflığı artırardı.

Nuray,

AzNews.az