Trampa sui-qəsd edildi: Tapançadan 5 atəş açıldı! - FOTOLAR

Dünyanın diqqətlə izlədiyi Vaşinqton Hilton Otelində keçirilən rəsmi şam yeməyi gözlənilmədən silah səsləri ilə yarımçıq qalıb. ABŞ prezidenti Donald Tramp və birinci xanım Melaniya Trampın iştirak etdiyi tədbirdə baş verən insident genişmiqyaslı panikaya səbəb olub.

Şahidlərin sözlərinə görə, tədbir başlayan zaman bal zalının arxa hissəsindən ardıcıl atəş səsləri eşidilib. “Atəş açıldı!” qışqırıqları fonunda yüzlərlə qonaq masaların altına sığınaraq təhlükədən yayınmağa çalışıb. Hadisə yerində olan Məxfi Xidmət əməkdaşları dərhal müdaxilə edərək silahlarını çıxarıb və təhlükə mənbəyinə doğru irəliləyiblər.

Prezident Donald Tramp və Melaniya Tramp bir neçə saniyə ərzində təhlükəsizlik əməkdaşları tərəfindən zaldan çıxarılaraq təhlükəsiz əraziyə aparılıblar. Rəsmi məlumatlara görə, hücumçu qısa müddətdə zərərsizləşdirilərək saxlanılıb.

Hadisədən sonra açıqlama verən Prezident Tramp hüquq-mühafizə orqanlarının operativ fəaliyyətini yüksək qiymətləndirib:

“Vaşinqtonda çox hadisəli bir axşam idi. Məxfi Xidmət və hüquq-mühafizə orqanları fantastik iş gördülər. Onlar sürətli və cəsarətli davrandılar. Hücumçu tutuldu. Biz tam şəkildə onların göstərişlərinə uyğun hərəkət edəcəyik.”

Hadisə zamanı oteldə olan CNN aparıcısı Volf Blitzer də yaşadıqlarını canlı yayımda bölüşüb. O bildirib ki, silahlı şəxslə cəmi bir neçə metr məsafədə olub və atəş səslərindən sonra hücumçunu yerdə uzanmış vəziyyətdə görüb. Təxliyə zamanı panika içində olan Blitzerin ayaqqabılarından birini itirdiyi də qeyd olunur.

Məlumata görə, hadisə baş verən zaman zalda ABŞ administrasiyasının bir sıra yüksək vəzifəli şəxsləri də olub. Onların arasında müdafiə naziri Pit Heqset, xəzinədarlıq katibi Skott Bessent, milli kəşfiyyat direktoru Tulsi Qabbard, FTB direktoru Kaş Patel və səhiyyə naziri Robert F. Kennedi də yer alıb.

Hadisənin detalları və hücumun motivləri ilə bağlı araşdırma davam edir.