Yazıçımız daha bir nüfuzlu siyahıda

Polşanın paytaxtı Varşavanın ev sahibliyi etdiyi Slavyan Ədəbiyyat Festivalının YUNESKO və IWU təsisatları ilə birgə təqdim edəcəkləri Adam Mitskeviç adına Beynəlxalq Mükafatın 18 nəfərdən ibarət nominantlar siyahısı açıqlanıb.

AzNews.az xəbər verir ki, siyahıda azərbaycanlı yazıçı Varisin də adı var. Həmyerlimiz siyahıya ötən ilin sonunda Moskvada işıq üzü görmüş "3+1" audiokitabına görə layiq görülüb.

"3+1" audiokitabı günümüzün hazırkı qaranlığında axtarıb işıq tapanlar barədə psixoloji xarakteristikadır, bir pozitivin üç neqativ üzərindəki qələbəsinin şərhidir. Kitabın leytmotivi isə budur: "İnsan özünün ən güclü zərbələrini yaşadığı zamanın ən zəif vaxtlarına saxlamalıdır".

Qeyd edək ki, nominantların hamısı Adam Mitskeviç adına diploma layiq görüləcəklər. Qalib isə baş mükafatı – Mitskeviç medalını qazanacaq.