“Akkord”un 18 milyonluq istiqrazı yerləşdirilib

"Akkord" Korporasiyasının ikinci dəfə buraxdığı korporativ istiqrazlardan 18 milyon manatlıq istiqraz artıq yerləşdirilib.

"Akkord" Korporasiyası tərəfindən buraxılan 50 milyon manatlıq korporativ istiqrazlardan 15 milyon manat məbləğində istiqraz "AtaBank" Açıq Səhmdar Cəmiyyəti, 3 milyon manat məbləğində istiqraz isə "Azərbaycan Beynəlxalq Bankı" ASC tərəfindən əldə edilib.

Xatırladaq ki, buraxılışı Qiymətli Kağızlar Üzrə Dövlət Komitəsi tərəfindən 04 noyabr 2013-cü ildə qeydiyyata alınmış "Akkord" Korporasiyasının korporativ istiqrazlarının ikinci emissiyası çərçivəsində hər birinin nominal dəyəri 1.000 (bir min) manat, məcmu nominal dəyəri 50.000.000 (əlli milyon) manat, gəlirlik dərəcəsi isə 11,75% təşkil edən 50.000 (əlli min) ədəd istiqrazlar dövriyyəyə buraxılıb.

Yerləşdirilməsi Bakı Fond Birjasında kütləvi təklif üsulu ilə həyata keçiriləcək istiqrazların dövriyyə müddəti 3 il təşkil edir. "Akkord" Korporasiyasının buraxdığı istiqrazların satışının təşkil edilməsi məqsədilə Market Meyker qismində "Azərbaycan Beynəlxalq Bankı" ASC çıxış edir.

AzNews.az