“Cümə“ məscidinin dini icması qanvermə aksiyası keçirib

Fevralın 26-da Xocalı soyqırımının 22-ci ildönümüdür. Bu münasibətlə DEVAMM, İçərişəhər "Cümə" məscidinin dini icması və "Dəyərlər AİN"-in təşkilatçılığı ilə "Əsmaul-Hüsna" proqramı çərçivəsində qanvermə aksiyası keçirilib. Aksiya saat 10:00-dan 16:00-a kimi davam edib. Nəsimi rayonunda yerləşən Qan Bankında təşkil edilmiş aksiyada yığılan qanlar talassemiyalı xəstələrə veriləcək.

Qanvermə aksiyasında onlarla inanclı iştirak edib.

Aksiyada iştirak edən DEVAMM sədri, İçərişəhər "Cümə" məscidinin imam-camaatı Hacı İlqar İbrahimoğlu "Dəyərlər TV"-yə açıqlamasında deyib ki, bu cür aksiyaların tək məhərrəm-səfər əyyamında deyil, müxtəlif vaxtlarda keçirilməsini düzgün hesab edir: "Bu gün Xocalı faciəsinin növbəti ildönümüdür. Biz bu cür aksiyaların tək Məhərrəm-Səfər əyyamında deyil, müxtəlif vaxtlarda keçirilməsinin tərəfdarıyıq. Əziz şəhidlərimizi anırıq. Allahdan tofiqlar istəyirik ki, bu cinayəti törədənlər öz cəzalarına çatmış olsun, həmçinin işğal olunmuş torpaqlarımız da tezliklə geri qayıtsın".