Əbülfəs Qarayev aktyoru mükafatlandırdı - FOTO

60 illik yubileyi münasibəti Möylə Mirzəliyev Fəxri Fərmanla təltif edib

Mədəniyyət naziri Əbülfəs Qarayev Akademik Musiqili Teatrın aktyorunu mükafatlandırıb.

AzNews.az xəbər verib ki, nazir teatr sahəsində uzunmüddətli səmərəli fəaliyyəti, milli mədəniyyətimizin inkişafındakı xidmətləri və 60 illik yubileyi münasibəti ilə Akademik Musiqili Teatrın aktyoru Möylə Mirzəliyevi Nazirliyin Fəxri Fərmanı ilə təltif edib. Bu münasibətlə Teatrda təqdimetmə mərasimi keçirilib. Teatrın direktoru Əliqismət Lalayev yubilyara uğurlar arzulayıb.

Möylə Mirzəliyev fəaliyyətinə verilən yüksək qiymətə və qayğıya görə Mədəniyyət Nazirliyinin rəhbərliyinə minnətdarlığını bildirib: “Bu təkcə mənim deyil, fəaliyyət göstərdiyim teatrın yaradıcı heyətinin əməyinə göstərilən diqqətin bariz nümunəsidir. Çalışacağam ki, bundan sonra da mənə həvalə edilən rolları böyük yaradıcılıq şövqü ilə ifa edim”.

Qeyd edək ki, M. Mirzəliyev 1985-cı ildə Azərbaycan Dövlət Mədəniyyət və İncəsənət Universitetinin ''Musiqili komediya aktyorluğu'' fakültəsini bitirib. 1985-1992-ci illərdə Azərbaycan Dövlət Opera və Balet Teatrında çalışıb. 1992-ci ildən bu günədək Azərbaycan Dövlət Akademik Musiqili Teatrının səhnəsində onlarla yaddaqalan obrazlar yaradıb. O, bu gün də repertuarda olan tamaşalarda uğurla çıxış edir, teatrın 110-cu mövsümündə premyeraları nəzərdə tutulan tamaşalarda məşqlərini davam etdirir.

Bahar RÜSTƏMLİ

AzNews.az