ABŞ kəşfiyyatı Roma Papasını da dinləyirmiş

ABŞ-ın Milli Kəşfiyyat Agentliyi (NSA) Vatikanı da dinləyirmiş. ANS PRESS-in məlumatına görə, belə bir iddia ilə İtaliyanın "Panaroma" jurnalı çıxış edib. Jurnalın yazdığına görə, NSA-nın 2012-ci ilin dekabrın 8-dən 2013-cü ilin yanvarın 8-nə qədər dinlədiyi telefon nömrələri içində Vatikana məxsus telefonlar da var.

Yazıda bildirilir ki, Roma Papasının fəaliyyətinin ABŞ kəşfiyyatı tərəfindən izlənildiyi "Wikileaks"də də açıqlanıb.

Vatikanın mətbuat xidmətinin rəhbəri rahib Federiko Lombardini bu xəbərə soyuqqanlı yanaşıb: "Biz belə birməlumata malik deyilik. Bununla belə istənilən durumda əndişəyə gərək yoxdur".

Qeyd edək ki, NSA-nın Vatikanı dinlədiyi iddia edilən zaman Roma Papası 16-cı Benediktus olub. Hazırda isə Vatikana argentinalı Fransisk rəhbərlik edir.