Həbs olunan qazi ilə bağlı Baş prokurorun müavini protest verdi

Baş Prokurorluğun Mətbuat xidmətinin məlumatı

"Bəzi kütləvi informasiya vasitələri və sosial şəbəkə səhifələrində Vətən Müharibəsində döyüşərkən yaralanan qazi Aydın Ağazadənin məhkəmə iclas zalında həbs edilməsi ilə bağlı məlumatlar yayılmışdır.
Müəyyən edilmişdir ki, Cəlilabad rayon məhkəməsinin 2 fevral 2021-ci il tarixli hökmü ilə Aydın Ağazadə Cinayət Məcəlləsinin 234.2 (satış məqsədilə narkotik maddələri daşıma), 177.2.1 (oğurluq; qabaqcadan əlbir olan bir qrup şəxs tərəfindən törədildikdə) və 177.2.3-cü (oğurluq; yaşayış sahəsinə qanunsuz daxil olmaqla törədildikdə) maddələri ilə təqsirləndirilərək 4 il 3 ay müddətinə azadlıqdan məhrumetmə cəzasına məhkum edilmişdir.
Cinayət işi Baş Prokurorluğun rəhbərliyinin tapşırığı əsasında öyrənilərkən təqsirləndirilən şəxs Aydın Ağazadəyə elan edilmiş ittihamın məhkəmə istintaqı zamanı tam təsdiq edildiyi müəyyən edilmişdir".

Bu barədə Baş prokurorluğun mətbuat xidməti məlumat yayıb. AzNews.az xəbər verir ki, məlumatda daha sonra deyilir:

"Bununla belə, təqsirləndirilən şəxs Aydın Ağazadənin Vətən uğrunda gedən döyüşlərdə iştirakı, göstərdiyi şücaətə görə dövlət təltiflərinə layiq görülməsi yüngülləşdirici hal kimi nəzərə alınmaqla, A.Ağazadənin cəzasının yüngülləşdirilməsi məqsədilə Baş Prokurorun müavini tərəfindən 12 fevral 2021-ci il tarixdə apelyasiya protesti verilmişdir.

İctimaiyyətə əlavə məlumatın verilməsi təmin ediləcəkdir".

Qeyd: Qazi Aydın Ağazadə ilə bağlı məsələni diqqətdə saxlayan xəbər saytlarından biri də AzNews.az analitik-informasiya portalı olub. Portalımız adından məsələyə göstərdiyi yüksək həssaslığıa görə, Baş prokuror Kamran Əliyevə təşəkkür edirik!

AzNews,az