“Həbs olunan gömrük rəisi qardaşım deyil” – Keçmiş prokuror

Türkiyədə həbs olunan Naxçıvan Muxtar Respublikasının Sədərək Gömrük Keçid Məntəqəsinin rəisi Mirməhəmməd Seyidovun keçmiş prokuror Mirələkbər Seyidovun qardaşı olması haqda Azərbaycan mətbuatında bir sıra məlumatlar yer alıb.

Bununla bağlı AzNews.az-a açıqlama verən Mirələkbər Seyidov bu xəbərin onda təəccüb yaratdığını söyləyib.

Sabiq prokuror bildirib ki, Naxçıvan Muxtar Respublikasının Sədərək Gömrük Keçid Məntəqəsinin rəisi Mirməhəmməd Seyidovla hər hansı qohumluq əlaqəsi yoxdur:

"Sədərək Gömrük Keçid Məntəqəsinin rəisi mənim qardaşım deyil. Soyadımızın eyni olması mümkündür. Amma o başqa Seyidovlardandır. Onunla heç bir əlaqəmiz yoxdur".

AzNews.az