ABŞ-da güllələnən azərbaycanlının əmisi danışdı - Eksklüziv

Qatil Elçini güllə ilə boynunun ardından vurub.

ABŞ-da 29 yaşlı azərbaycanlı iş adamının qətlinin bəzi təfərrüatı məlum olub.

Şimali Karolina ştatında Şərqi Çarlotte şəhərində «Fixer Electronic Repair» dükanının sahibi 29 yaşlı Elçin Xəlilovun əmisi, Sumqayıt Dövlət Universitetinin kafedra müdiri Tahir Xəlilov AzNews.az-a eksklüziv açıqlamasında bildirib ki, mərhum mobil telefon biznesi ilə məşğul olub:

“Elçin Sumqayıtda 3 nömrəli orta məktəbi bitirib, Bakıda Memarlıq və İnşaat Mühəndislik Universitetini bitirərək ali təhsil alıb.

Bir müddət Bakıda işlədikdən sonra ABŞ-a gedib və orada iş qurmağa qərar verib.

Elçin mobil telefon biznesi ilə məşğul idi. Hardasa 4 ildir ki, orada idi, həm telefon satırdı, həm də təmir işlərinə baxırdı. Çox güman ki, bu qətli kimlərsə qabaqcadan planlaşdırıblarmış. Qəfildən mağazaya basqın olub. İçəri girən oğrular Elçinin güllə ilə boynunün ardından vurub. Onun yerə yıxıldığını görüb mağazada olan telefonları da oğurlayıblar. Xəstəxanaya çatdırılsa da onun həyatını qurtarmaq mümkün olmayıb. Hadisə qarət məqsədi ilə edilib. Elçinin meyiti hələ də ordadır”.

Tahir Xəlilov qeyd edib ki, hazırda Elçin Xəlilovun meyitinin Azərbaycana gətirilməsi istiqamətində Azərbaycanın ABŞ-dakı səfirliyi ilə danışıqlar aparılır:

“Çox güman ki, yanvarın 19-u, ya da 20-də Elçin Xəlilovun meyiti Bakıda olacaq. Elçin subay idi, amma bilmədik ki, orada sevdiyi, nişanlısı var ya yox”.

Qeyd edək ki, yanvarın 14-də Şimali Karolina ştatında Şərqi Çarlotte şəhərində «Fixer Electronic Repair» dükanının sahibi 29 yaşlı həmyerlimiz Elçin Xəlilov iş yerində güllələnib.

Yaralı xəstəxanaya çatdırılsa da orada dünyasını dəyişib. Şahidlərin dediyinə görə, onu güllələyən mağazadan oğurluq etmək istəyən şəxs olub.

Xatırladaq ki, Elçin Xəlilovun valideynləri Sumqayıt şəhərində yaşayır. Onun özündən böyük bir qardaşı da var.

Bahar RÜSTƏMLİ

AzNews.az

image description image description image description image description image description