Gələn il Azərbaycan 1,5 milyard dollara yaxın borc qaytaracaq

100,0 milyon AZN həcmində yeni borcların cəlb edilməsi proqnozlaşdırılıb

2020-ci ilin dövlət büdcəsi xərclərinin tərkibində dövlət borcuna xidmət xərclərinin 2 milyard 458,2 milyon manat (1 milyard 446 milyon dollar), o cümlədən faiz xərclərinin 775,4 milyon manat təşkil edəcəyi proqnozlaşdırılır.

AzNews.az-ın məlumatına görə, Maliyyə Nazirliyinin Azərbaycan Respublikasının 2020-ci ilin dövlət və icmal büdcələrinin ilkin göstəricilərinə dair açıqlamada bildirilir ki, imzalanmış kredit sazişləri çərçivəsində, 2020-ci il ərzində xarici dövlət borcu üzrə 559,4 milyon ABŞ dolları məbləğində vəsaitin istifadə edilməsi (yeni borclanma) nəzərdə tutulur.

Eyni zamanda, daxili borc üzrə 2020-ci il ərzində 100,0 milyon AZN həcmində yeni (təkrarmaliyyələşən borclar nəzərə alınmadan) borcların cəlb edilməsi proqnozlaşdırılıb.

2020-ci ilin ilin əvvəlinə, imzalanmış kredit sazişlərindən istifadə proqnozları nəzərə alınmaqla Azərbaycan Respublikasının xarici dövlət borcunun 8 milyard 860.0 milyon ABŞ dolları ekvivalenti, daxili dövlət borcunun isə 1 milyard 420 milyon manat təşkil edəcəyi gözlənilir.

AzNews.az