Siyasi partiyalar haqqında” yeni qanuna müxalifətin mövqeyi

Ölkədə proporsional seçki sisteminə keçidlə bağlı ən azından müzakirələr gedir və gələcəkdə bu sistemin tətbiqi ehtimalı yüksəkdir

Milli Məclis tərəfindən “Siyasi partiyalar haqqında” yeni qanun layihəsinin hazırlanacağının anonsu verilib.

Qeyd olunub ki, parlamentdə təmsil olunan siyasi partiyaların təklifləri əsasında Milli Məclisin spikeri tərəfindən müvafiq qərar qəbul olunub. Bundan əlavə, dövlət qeydiyyatına alınmış siyasi partiyaların yeni qanun layihəsi ilə bağlı təkliflərini Milli Məclisə təqdim etmələri xahiş olunub.

Bəs, yeni layihə ilə bağlı siyasi partiyalar nə düşünür? Onlar qanuna hansı dəyişiklikləri təklif edəcəklər?

Suallarımıza cavab almaq üçün bir sıra siyasi partiyaların funksionerləri ilə əlaqə saxladıq.

Azərbaycan Milli İstiqlal Partiyasının sədri Arzuxan Əlizadə qeyd edib ki, sözügedən qanuna dəyişikliklər məsələsi çoxdandır ki, gündəmdədir:

“Qanun 1992-ci ildə qəbul olunub və indiyə qədər 27 dəfə qanuna düzəlişlər edilib. Bizim də dəyişikliklə bağlı təkliflərimiz var. Xüsusilə də siyasi partiyaların maliyyələşməsi və bir sıra digər məsələlərlə bağlı təkliflərimizi təqdim edəcəyik. Təbii ki, partiyaların gələcək inkişafına yönələcək dəyişikliklər olacaqsa, bunu alqışlayacağıq. Çünki, həqiqətən də, bir sıra düzəlişlərə ehtiyac var. Partiyaların ölkənin siyasi gündəminə təsirini artıracaq, onların normal fəaliyyətini təmin edəcək, insanlarla münasibətləri gücləndirəcək düzəlişlər edilməsinə ehtiyac var. Arzuxan Əlizadə AMİP tərəfindən dəyişikliklərlə bağlı təkliflər paketinin uzun müddətdir hazırlandığını və parlamentə təqdim olunacağını qeyd edib.

Respublikaçı Alternativ Partiyasının (REAL) icra katibi Natiq Cəfərli isə bildirib ki, partiyaların siyasi sistemə inteqrasiyası üçün qanunvericilik bazası təkmilləşdirilməlidir:

“Ölkədə proporsional seçki sisteminə keçidlə bağlı ən azından müzakirələr gedir və gələcəkdə bu sistemin tətbiqi ehtimalı yüksəkdir. Bu da sözügedən qanuna dəyişiklikləri zəruri edir. REAL tərəfindən bununla bağlı ötən ilin oktyabrında təkliflər paketi hazırlanıb. Biz əvvəlcədən belə bir ehtimalın olduğunu bilirdik deyə, 10 ay öncə dəyişikliklər paketini hazırlayıb, publik elan vermişik. Təkliflərimizin əsas məğzi isə ondan ibarətdir ki, siyasi partiyalar bir şəxs ətrafında formalaşmaqdansa, ideoloji platformalara çevrilməli, ideyaların mübarizəsinə qapı açmalıdır.

Bütöv Azərbaycan Xalq Cəbhəsi Partiyasının sədr müavini Niyaməddin Orduxanlı da bu addımı yüksək qiymətləndirib:

“Nəzərə almalıyıq ki, bu qanun 1992-ci ildə, Azərbaycanın müstəqilliyini yeni əldə etdiyi dönəmdə qəbul olunub. Bu dövr ərzində siyasi proseslərdə böyük dəyişikliklər baş verib. BAXCP hər zaman “Siyasi partiyalar haqqında” qanuna dəyişikliklərin edilməsi təşəbbüsü ilə çıxış etmişik. Partiyamızın lideri Qüdrət Həsənquliyev də partiya daxilində zaman-zaman bu məsələni qaldırıb.

Biz, partiya olaraq bu işdə aktiv formada iştirak edib, təkliflərlə çıxış edəcəyik. Xüsusən də, siyasi partiyaların qeydiyyatı məsələsində dəyişikliklər var. Azərbaycan Qafqazda yeganə ölkədir ki, parlamentdə müxalifət fraksiyası yoxdur və proporsional sistem tətbiq olunmur. Bu da partiyaların fəaliyyətinə ciddi təsir göstərir. Zənnimcə, yeni qanun layihəsinin qəbulunda proporsional seçki sistemində təmsilçilik də öz yerini alacaq”.

Azərbaycan Kommunist Partiyasının Mərkəzi Komitəsinin sədri Rauf Qurbanov isə qeyd edib ki, yeni qanunun hazırlanmasına və qəbul olunmasına çoxdan ehtiyac var idi:

Yeni qanun lahiyəsinə verəcəyim təklif ondan ibarətdir ki, eyni siyasi platformaya malik olan partiyaların müxtəlif adlarla dövlət qeydiyyatına alınmasına yol verilməsin. İkinci təklifim isə ondan ibarətdir ki, bildiyimiz kimi, cəmiyyətdə müxtəlif siyasi baxşılar və insanların mənsub olduqları fərqli siyasi partiyalar var, sol, sağ, mərkəzçi, liberal, millətçi və s. Hesab edirəm ki, yeni qanun lahiyəsində bu məsələyə ciddi diqqət yetirilməli və partiyaların dövlət qeydiyyatından keçməsində bu hal əsas meyar kimi nəzərə alınmalıdır”.