Lalə Şövkət: "Seçkilərdə İlham Əliyevə alternativ yoxdur"

“Növbədənkənar prezident seçkilərində bu gün İlham Əliyevə alternativ yoxdur”.

Bunu Modern.az-a açıqlamasında tanınmış siyasətçi, ləğv edilmiş Azərbaycan Liberal Partiyasının keçmiş lideri Lalə Şövkət bildirib.

“Mən həmişə qaraya qara, ağa ağ demişəm. Qarabağın azad olunması İlham Əliyevin böyük tarixi nailiyyətidir. Bunu heç kim dana bilməz. Ələlxüsus, Şuşanın azad olunması hər bir azərbaycanlının əlçatmaz və ən böyük arzusu idi. Şuşanın hər birimiz üçün mistik əhəmiyyəti var. Azərbaycan Qarabağsız, Şuşasız tam canlı ola bilməzdi. Bu çox çətin işi İlham Əliyev milləti səfərbər edərək həll etdi. Şəhidlərimizin qanı yerdə qalmadı. Onların ruhu daim bizimlə olacaq. Bu məsələnin həllinin hərbi, xüsusən də geosiyasi razılıq baxımından nə qədər müşkül olduğunu mən bir siyasətçi kimi yaxşı bilirəm. Bu labirintdən Azərbaycan məharətlə çıxdı. Bu da sözsüz ki, İlham Əliyevin böyük diplomatik uğurudur”, - deyə Lalə Şövkət vurğulayıb.

O, hazırda ölkəni təhlükədən qorumağın olduqca böyük məsuliyyət tələb etdiyini bildirib:

“Amma bununla bərabər Azərbaycanın daxili siyasətində problemlər çoxdur. Onların arasında təxirəsalınmaz məsələlər də var. İstərdim ki, bunlar da tezliklə həll olunsun. İndiki ədalətsiz, qəddar, alovlanan dünyada ölkəni hər təhlükədən qorumaq böyük məsuliyyət və məharət tələb edir. Ona görə də, biz millət olaraq hər şeyə hazır olmalıyıq. Sayıq və ehtiyatlı davranmalıyıq. Bu bizim hər birimizdən asılıdır”.

Xatırladaq ki, Lalə Şövkət 1993-cü il iyulun 7-də Azərbaycanın dövlət katibi vəzifəsinə təyin edilib. 1994-cü ilin yanvarında istefa verib və ilk dəfə Azərbaycan tarixində ali dövlət vəzifəsindən könüllü istefa presedenti yaradıb. Dövlət katibi vəzifəsindən istefaya getdikdən sonra ona fövqəladə və səlahiyyətli səfir rütbəsi verilib və Azərbaycanın BMT-də daimi nümayəndəsi təyin edilib. Lakin bundan imtina edib.