Çingiz Əsədullayevin dairəsindən şok qərar - Nəticələr ləğv edildi (Yenilənib)

Bu gün Mərkəzi Seçki Komissiyasının (MSK) iclasında noyabrın 1-də Milli Məclisə (MM) keçirilmiş seçkilərlə əlaqədar daxil olmuş müraciətlərə baxılıb.


Məlumata görə, MSK-ya müraciət edən 90 saylı Ağdaş Seçki Dairəsindən Yeni Azərbaycan Partiyasından (YAP) deputatlığa namizədliyi irəli sürülmüş və deputatlığa namizədliyi qeydə alınmış İlqar Vəliyev və bu dairədə deputatlığa namizədliyi qeydə alınmış Qalib Qarayev 90 saylı Ağdaş Seçki Dairəsində seçkinin nəticələrinin ləğv edilməsini xahiş ediblər.

MSK üzvü Ramiz İbrahimov deyib ki, şikayətdə bu dairədəki məntəqələrdə səsvermə günü ciddi pozuntulara yol verildiyi qeyd edilib: "Bu dairədə bir sıra seçki məntəqələri bələdiyyə binalarında yerləşir, şikayətdə bildirilir ki, bəzi bələdiyyə sədrləri və icra nümayəndələri səsvermə günü seçkiyə müdaxilə ediblər. Biz protokollara baxış keçirmişik, 3 saylı məntəqədə səslərin sayına sonradan düzəliş edilib. 5 saylı məntəqədə də səslərin göstərilməsində balans pozulur. 7 saylı məntəqədə də səs verənlərin sayı ilə seçki qutusundan çıxan səslərin sayında fərq mövcuddur. 12 saylı, 9 saylı seçki məntəqələrində də belə hallara rast gəlinir. Ümumilikdə seçki məntəqələrindən 17-də belə ciddi problem var ".

MSK 90 saylı Ağdaş Seçki Dairəsində seçkinin nəticələrinin ləğv edilməsi barədə qərar qəbul edib.

Qeyd olunub ki, MSK səslərin nəticələri etibarsız sayılan seçki məntəqələrinin sayının bu dairədəki seçki məntəqələrinin sayının beşdə birindən, bu məntəqələrdəki seçicilərin sayının dairədəki seçicilərin sayının dörddə birindən çox olduğu üçün belə bir qərar verib.

Qeyd edək ki, 90 saylı Ağdaş Seçki Dairəsində lider namizəd bitərəf, IV çağırış Milli Məclisin deputatı Çingiz Əsədullayevdir.

APA.az


***
17:49

Məsələ ilə bağlı Ç.Əsədullayevlə əlaqə saxladıq. O, AzNews.az-a açıqlamasında seçkilərin nəticəsinin ləğv olunmasından xəbərsiz olduğunu bildirdi: "Mən də sizin kimi mətbuatdan oxudum. Seçkilərin nəticəsinin nə üçün ləğv olunduğunu tam araşdırandan sonra Mərkəzi Seçki Komisiyasının qərarı ilə bağlı şikayət edib-etməyəcəyimə qərar verəcəyəm".

Ç.Əsədullayev adının sabiq milli təhlükəsizlik naziri Eldar Mahmudov olayında hallanması ilə bağlı məsələyə də münasibət bildirib: "Mənim Eldar Mahmudovla heç bir bağlantım yoxdur. Mənim onunla nə işim ola bilər ki? O nazirdir, mənsə bankir və millət vəkili... Adımın onunla birlikdə hallanması o demək deyil ki, bu, həqiqətdir".

Məlumat üçün bildirək ki, mətbuatda Ç.Əsədullayevin E.Mahmudovun qohumu olduğu və sabiq nazirin qudası, Beynəlxalq Bankın rəhbəri Cahangir Hacıyevə dövlətin külli miqdarda vəsaitinin ölkədən çıxarılmasında yardım etdiyi ilə bağlı iddialar yer alıb.