Çexiyanın Baş naziri istefaya göndərilə bilər

“Son günlər “Leylək yuvası” şirkəti barədə KİV-də gedən xəbərlər bu məsələnin araşdırılmasının müstəqil aparılmamasına dair şübhələr oyadır. Senat bu məsələdən yan keçə bilməz”.

Çex Respublikası Senatı Baş nazir Andrey Babişi istefa verməyə çağırıb.

Həm də iri sahibkar olan A.Babişin şirkətlərindən birinə Avropa İttifaqından 2 milyonadək avro məbləğində subsidiya almaq üçün sui-istifadə hallarına yol verdiyi ehtimal olunur. Senatorlar bu məsələ ilə bağlı hazırda polis tərəfindən aparılan araşdırma başa çatanadək Baş nazirin istefa verməsini zəruri sayıblar.

Senatın sözügedən qərarı A.Babişin dəvət olunduğu bugünkü iclasa vaxt azlığını əsas gətirərək gəlməməsindən və nə vaxt gələcəyini bildirməməsindən sonra verilib.

“Son günlər “Leylək yuvası” şirkəti barədə KİV-də gedən xəbərlər bu məsələnin araşdırılmasının müstəqil aparılmamasına dair şübhələr oyadır. Senat bu məsələdən yan keçə bilməz”, - Senatın iclasından sonra yuxarı palatada üstün mövqedə olan Vətəndaş Demokrat Partiyası fraksiyasının rəhbəri Miloş Vistrçil jurnalistlərə bildirib. (report)

AzNews.az