Pakistandan Laçına, Laçından Pakistana

Azərbaycan ilə Pakistan arasındakı münasibətlər dərin tarixi, mədəni və strateji bağlara əsaslanır. Bu əlaqələr təkcə diplomatik münasibətlərdən ibarət deyil, həm də xalqlar arasında mənəvi yaxınlıq və həmrəylik üzərində qurulub. Pakistanın Baş naziri Şahbaz Şərifin Laçın şəhərinə səfəri və Prezident İlham Əliyevlə görüşü bu əlaqələrin davamlı inkişafına bir daha işıq saldı.

Pakistan Azərbaycan üçün strateji tərəfdaşlardan biridir. Qarabağ münaqişəsində Pakistanın göstərdiyi prinsipial mövqe və Azərbaycanın ərazi bütövlüyünü dəstəkləməsi bu dostluğun möhkəm təməllərindən biridir. Ermənistanla diplomatik əlaqələrdən imtina edən Pakistan bu məsələdə Azərbaycanın ən yaxın müttəfiqlərindən biri olub. Eyni zamanda, Azərbaycan da Pakistanın müxtəlif beynəlxalq məsələlərdə mövqeyini dəstəkləyir. Bu, hər iki ölkənin ortaq maraqlarını və prinsipial mövqelərini nümayiş etdirir.

Hərbi sahədə əməkdaşlıq iki ölkə arasındakı əlaqələrin mühüm istiqamətlərindən biridir. Pakistan Azərbaycanın hərbi potensialının artırılmasına dəstək göstərir və bu əməkdaşlıq ikitərəfli münasibətlərin strateji ölçüsünü gücləndirir. Bundan əlavə, enerji və ticarət sahələrində qarşılıqlı maraqlar, iki ölkə arasındakı iqtisadi əlaqələri inkişaf etdirmək üçün böyük imkanlar yaradır. Azərbaycanın zəngin enerji ehtiyatları Pakistanın enerji təhlükəsizliyini təmin edə bilər, Pakistan isə Azərbaycanın Cənubi Asiya bazarına çıxışını asanlaşdıran bir tərəfdaş rolunu oynayır.

Laçın şəhərində baş tutan görüş iki ölkənin münasibətlərini daha da dərinləşdirmək üçün yeni imkanlar açdı. Bu səfər həm də Pakistanın azad edilmiş ərazilərin bərpası prosesində fəal iştirak etmək niyyətini vurğuladı. Regional sabitlik və təhlükəsizliyin təmin edilməsi məsələsində Azərbaycan və Pakistan ortaq maraqları paylaşır və bu istiqamətdə əməkdaşlıq etmək əzmindədirlər.

Bu səfər bir daha sübut etdi ki, Pakistan və Azərbaycan arasındakı dostluq yalnız hökumətlər səviyyəsində deyil, həm də xalqlar səviyyəsində möhkəm təməllərə söykənir. Hər iki ölkə regional sülh, sabitlik və rifah naminə əməkdaşlıq yolunda addımlar atmaqda qərarlıdır. Bu əlaqələr gələcəkdə də strateji tərəfdaşlıq və qardaşlıq ruhunda inkişaf edəcək.

Mövsüm Novruzoğlu,

AzNews.az