- Türkiyə
- 9 İyul 20:14
- 11 854
Tuncay Özkanın "FETÖ-nün bəlləyi" kitabı işıq üzü görüb
Türkiyənin tanınmış jurnalisti, İzmir millət vəkili Tuncay Özkan 2006-cı ildə İzmirdə bələdiyyə avtobusunda tapılıb dövlətə təhvil verilən USB yaddaş qurğusunun iyirmi illik tarixini qələmə alıb.
Söhbət 15 874 nəfərlik fişləmə arxivindən, üstü ört-basdır edilmiş istintaqdan və qarşısı alına biləcəyi halda qarşısı alınmayan hərbi çevriliş cəhdindən gedir.
Bir ordunun qara qutusu
11 dekabr 2006-cı il. İzmirdə bir bələdiyyə avtobusunda USB yaddaş qurğusu tapıldı. Həmin yaddaş əvvəlcə Egey Ordu Komandanlığına, oradan Quru Qoşunları Komandanlığına, daha sonra isə Hərbi Hava Qüvvələri Komandanlığına çatdırıldı. Eyni məlumatlar başqa bir yolla jurnalist Tuncay Özkanın da əlinə keçdi. Özkan həmin faylları iki CD-yə köçürərək dövlət orqanlarına təqdim etdi.
USB-də Hərbi Hava Qüvvələrində 1996–2006-cı illər arasında aparılmış fişləmə sisteminin arxivi yerləşirdi. Burada 15 874 nəfər haqqında məlumat vardı: zabitlər, gizirlər, onların həyat yoldaşları və uşaqları.
Məlumat bazasındakı şəxslər 27 müxtəlif kateqoriya üzrə təsnif edilmişdi. Bunların arasında "Ələvi", "Kürd", "Ülkücü", "MİT", "Casus", "Mənfi", hətta "Geyim tərzi" kimi bölmələr də yer alırdı. Minlərlə dosyaya 17 nəfərlik "abi" qrupu nəzarət edirdi. Arxivdən evlilik üçün hazırlanan siyahılar, 93 ələvi kəndinin xəritəsi, 135 zabitdən ibarət "A komandası" siyahısı, eləcə də vəzifəyə yüksəltmə və xidmətdən uzaqlaşdırma komissiyalarına aid şifrəli məlumatlar ortaya çıxdı.
Özkan kitabın arxa üz qabığında belə yazır:
"FETÖ-nün Yaddaşı əlimə keçəndə bunun sadəcə bir arxiv deyil, 15 İyul hadisələrinin əvvəlcədən yazılmış ssenarisi olduğunu bilmirdim."
"FETÖ-nün Yaddaşı" ("FETÖ'nün Belleği") kitabı Halk Kitabevinin nəşri kimi satışa çıxarılıb.
Özünü araşdıran, özünü təmizə çıxaran FETÖ
Kitabın ən sarsıdıcı hissəsi USB-dəki məlumatların dövlətin əlində olduğu halda necə ört-basdır edilməsindən bəhs edir.
Hərbi Hava Qüvvələrində yaradılmış Günəş İşçi Qrupu 2007-ci ildə həmin məlumatlar əsasında 173 hərbi qulluqçunun "irticai fəaliyyətlərlə məşğul olduğu müəyyən edilmişdir" nəticəsinə gəlmişdi.
Lakin iki il sonra eyni iş cəmi bir cümlə ilə bağlandı:
"Mənfi xarakterli hər hansı fakta rast gəlinməmişdir."
Özkan bu qərarı imzalayan şəxslərin 15 iyul çevriliş cəhdindən sonra verdikləri ifadələri və bununla bağlı sənədləri də kitabda dərc edib. Onun iddiasına görə, həmin imza sahibləri FETÖ-nün söhbət qruplarından keçmiş şəxslər idi. Beləliklə, FETÖ özünü özü araşdırmış, özünü özü təmizə çıxarmışdı.
Kitabın arxa üz qabığında bu sual da yer alır:
"Bəs Adil Öksüzü ağlayarkən güldürənlər kimlər idi?"
Bədəlini kim ödədi?
USB-ni dövlətə təhvil verən Tuncay Özkan sonradan "Ergenekon" işi çərçivəsində həbs olunaraq Silivridə beş il yarım həbsdə qaldı.
USB yaddaş isə, Özkanın yazdığına görə, 15 İyul hadisələrinin "mülki imamı" hesab edilən Adil Öksüzə çatdırıldı və məhv edildi.
Müəllifin fikrincə, bu ört-basdır əməliyyatının ağır nəticələri 15 iyul 2016-cı il gecəsi ortaya çıxdı: 251 nəfər həlak oldu, 2 193 nəfər yaralandı.
Özkanın "Ququ quşu əməliyyatı" ("Guguk Kuşu Operasyonu") adlandırdığı dövlətə sızma modelinə dair əsas tezisi belədir: bu hərbi çevrilişin qarşısını on il əvvəl almaq mümkün idi.
Kitab bu çağırışla yekunlaşır:
"Qaranlıqda qalan həqiqətləri öyrənməyin vaxtı gəlib, hətta çoxdan keçib."
.jpg)