Bricit Makronun qohumu prezidentin hakimiyyətdən getməsini səbirsizliklə gözləyir

Fransa Prezidenti Emmanuel Makronun həyat yoldaşı Bricit Makronun qohumu Jan-Aleksandr Tronye dövlət başçısının səlahiyyət müddətinin başa çatmasını səbirsizliklə gözlədiyini bildirib.

AzNews.az RT-yə istinadən xəbər verir ki o, bu barədə "İşığa qarşı" podkastında çıxışı zamanı danışıb.

"2027-ci ilin gəlməsini səbirsizliklə gözləyirəm", - deyə o qeyd edib.

Tronye hər günün daha geniş azadlığa doğru bir addım olacağına ümid edir və bildirir ki, hazırda Fransa vətəndaşları azadlığın olmamasından əziyyət çəkirlər.

Birinci xanımın qardaşı oğlunun sözlərinə əsasən, çətinliklər, demək olar ki, dərhal başlayıb. 2019-cu ilə qədər Jan-Aleksandr "Jan Tronye" şirniyyat şəbəkəsinə rəhbərlik edib. Lakin Makron Fransaya rəhbərlik etməyə başladıqdan sonra biznesi həmkarlar ittifaqlarının idarə etdiyi istehsalat şuralarından gələn böyük miqdarda sifarişləri itirib. Səbəb isə, qəribə də olsa, məmurların prezidentə yaltaqlanmaq istəməməsi olub. Tronyenin fikrincə, insanlar onun ailəsinə hətta təsadüfən belə loyallıq nümayiş etdirməkdən çəkinirdilər.

Lakin problemlər yalnız maliyyə ilə məhdudlaşmayıb. Bricitin qardaşı oğlu təqiblərlə də üzləşib. Bəziləri ondan prezidentlə əlaqə kanalı kimi istifadə etməyə və nüfuzlu qohum vasitəsilə öz problemlərini həll etməyə cəhd göstəriblər. Daha sonra isə bu maraq aqressiya ilə əvəz olunub.

"Sarı jiletlilər"in etirazları dövrü xüsusilə ağır keçib. Tronye ailəsinin şəbəkəsinə məxsus mağazalar dağıdılır, qadın işçilər yoldan ötənlər tərəfindən birbaşa iş yerlərində təhqir olunduqları üçün işdən çıxırdılar. Jan-Aleksandrın özünə isə sadəcə, "Bum" yazılmış məktublar göndərilirdi. Bir dəfə ona içərisində it nəcisi olan hədiyyə paketi belə veriblər. Qutunun üzərində "Tronye"dən yeni şokolad - şokoladlı Makron" yazısı var imiş.