Ceyhun Bayramov Oman Sultanının xüsusi nümayəndəsi ilə görüşüb - YENİLƏNİB

Nazir Ceyhun Bayramov Oman Sultanlığına rəsmi səfəri çərçivəsində Oman Sultanının xüsusi nümayəndəsi Seyid Əsad bin Tariq Al Səid ilə görüşüb.

Bu barədə XİN-dən məlumat verilib.

Görüşdə tərəflər Azərbaycan və Omanın həm ikitərəfli, həm də çoxtərəfli səviyyədə münasibətlərinin inkişafından məmnun olduqlarını bildiriblər.

İkitərəfli münasibətlərimizin yeni səviyyəyə qaldırılmasında və ölkələrimiz arasında siyasi və iqtisadi əməkdaşlığın daha da stimullaşdırılmasında yüksək səviyyəli səfərlərin həlledici rolu vurğulanıb.

Ölkəmizin Omanda Səfirliyinin fəaliyyətə başlamasının əməkdaşlığa daha da təkan verəcəyinə əminlik ifadə olunub.

Parlament diplomatiyasının ikitərəfli münasibətlərin möhkəmlənməsində həlledici rol oynadığını qeyd edən nazir Azərbaycanın 2025-ci ildə ölkələrimizin parlamentləri tərəfindən dostluq qruplarının yaradılmasını yüksək qiymətləndirdiyini qeyd edib.

Nazir Ceyhun Bayramov Azərbaycan tərəfindən 2026-cı ildə Bakıda keçiriləcək İslam Əməkdaşlıq Təşkilatının növbəti Zirvə görüşü və Ümumdünya Şəhərsalma Forumunun 13-cü sessiyasına (WUF13) ev sahibliyinin əhəmiyyətinə toxunaraq, bu tədbirlərin dialoq, həmrəylik və dayanıqlı inkişaf prinsiplərinin təşviqi baxımından yeni əməkdaşlıq imkanları yaradacağını bildirib.

Görüş zamanı həmçinin, qarşılıqlı maraq doğuran digər ikitərəfli və çoxtərəfli məsələlər, eləcə də regional vəziyyət müzakirə olunub.

***

12:17

Ceyhun Bayramov Omanın Baş nazirin beynəlxalq münasibətlər və əməkdaşlıq üzrə müavini və Oman Sultanının xüsusi nümayəndəsi Seyid Əsəd bin Tariq Əl Səid ilə görüşüb.

Bu barədə Azərbaycan XİN X-də paylaşım edib.

Görüşdə ikitərəfli münasibətlərin yeni səviyyəyə qaldırılmasında və Azərbaycan ilə Oman arasında siyasi və iqtisadi dialoqun genişləndirilməsində mühüm rol oynayan yüksək səviyyəli səfərlərin əhəmiyyəti vurğulanıb.

Azərbaycan regionda sülhün, əlaqənin və davamlı inkişafın təşviqi üçün çoxtərəfli platformalar çərçivəsində Omanla sıx əməkdaşlığı davam etdirməyə hazır olduğunu bir daha təsdiqləyib.