Dəstək verməsələr də, əngəl olmasınlar

KAMPANİYA: "NURU PAŞANI TANIYAQ VƏ HALALLIQ ALAQ"

Fazil Mustafa


31 mart soyqırımını bizlər niyə qeyd edirik? Çünki 95 il öncə - 1918-ci ildə bu tarixdə erməni-rus birliklərinin idarə etdiyi Bakı Komunasının quldur dəstələri otuz mindən artıq dinc Azərbaycan türkünü vəhşicəsinə qətlə yetirmişlər. Bu quldurlar Bakıda, Qubada, Şamaxıda, Muğanda məhz etnik əlamətə görə bütün türk əhalini öldürməklə qalmamış, Qubada olan yəhudiləri də məhv etmişlər. Bu hadisədən iki ay keçməmiş Nuru Paşanın komutanlığı ilə Qafqaz İslam Ordusu Azərbaycan türklərini xilas etmək üçün vətənimizə gəlmiş, Bakı Komunasının hərbi birləşmələrini darmadağın edərək sentyabr ayının 15-də Bakını işğaldan azad etmişdir. Məhz bu hadisədən sonra Milli hökumətimiz Gəncədən Bakıya köçmüş, o zamandan Bakı, Azərbaycanın başkəndi olmuşdur. Yüzlərlə Türk əsgəri Azərbaycan türkləri ilə birlikdə bu savaşlarda şəhid olmuşdur. Sonradan Nuru Paşa heç bir səlahiyyəti olmadığı halda Qarabağı da erməni quldurlarından təmizləmiş və orada Azərbaycan dövlətinin nəzarətini bərpa etmişdir.
Əvəzində nə baş vermiş? 95 il keçməsinə baxmayaraq, özünü o dövlətin varisi hesab edən biz azərbaycanlılar bu tarixi şəxsiyyətin və milli qəhrəmanımızın haqqını dəmək olar ki, unutmuşuq. Türkiyə səfirliyində kiçik bir büstdən və Şəhidlər Xiyabanında Şəhid Türk əsgərinin xatirəsinə qoyulmuş abidə üzərində kiçik bir yazıdan başqa onun adını xatırladacaq bir işarə bələ yox.

Öz xilaskarını unudan bir xalq heç vaxt qədirbilən sayılmaz!
Azadlığımız yolunda misilsiz qəhrəmanlıq göstərmiş Nuru Paşanın ruhundan halallıq almayan bir millətin və dövlətin təməlində halallıq ola bilməz!
Şəxsən mən, Nuru Paşanın ruhuna sayğısız yanaşan hər bir azərbaycanlını qınayıram.
Acınacaqlı haldır ki, Azərbaycanın rəsmi məqamları da bu məsələdə məqsədyönlü laqeydlik göstərirlər. Bunun əsas səbəbi bəzi savadsız və bədxah tarix "bilicilərinin" Nuru Paşa haqqında yazdıqları və yaydıqları iftiralardır. Guya ermənilərin dövlət qurmasına köməklik ədib, guya Azərbaycanı işğal etmək məqsədilə gəlib, guya müstəqil Azərbaycan dövlətinin qurulmasını istəməyib və s. bu kimi əsli olmayan iftiralar.
Əminəm ki, bizim qədirbilən insanlarla birlikdə başlatdığımız kampaniya yaxın zamanlarda rəsmi məqamlarca da, cəmiyyətimiz tərəfindən də Nuru Paşaya layiq olduğu dəyərin verilməsi ilə yekunlaşacaq.
Şərti adı "Nuru Paşanı tanıyaq və halallıq alaq" olan kampaniya üçün nəzərdə tutulan addımların təqribi sıralamasını təqdim edirəm:

1. Qafqaz-İslam Ordusu və Azərbaycanın Milli Qəhrəmanı Nuru Paşa haqqında filmləri səhifələrimizdə yerləşdirmək və paylaşmaq;

2. Nuru Paşaya dəyər verən hər bir FB istifadəçisinin səhifəsində onun şəklini yerləşdirmək və paylaşmaq;

3. Rəsmi məqamlara aşağıdakı təklifləri nəzərdə tutan müraciətlərin vaxtaşırı göndərilməsi və mətbuatda geniş təbliğat aparılması;

Bakı şəhərində Binəqədi rayonu ərazisində Prezidəntin sərəncamı ilə inşası nəzərdə tutulan camiyə Nuru Paşanın adının verilməsi

c) Ali məktəblərdə Nuru Paşa təqaüdünün verilməsi
ç) Hərbi məktəblərimizdən birinə Nuru Paşanın adının verilməsi
d) Ölkənin bütün şəhərlərində Nuru Paşanın adına küçə, prospekt, park, meydan adlarının verilməsi
ə) Nuru Paşanın qəhrəmanlığı və Qafqaz İslam Ordusunun Azərbaycanı xilası barədə faktların bütün orta və ali təhsil müəssisələrində tədris olunan tarix və ədəbiyyat dərsliklərinə salınması və əhatəli şəkildə şagirdlərə və tələbələrə çatdırılması.
Mövzu ilə bağlı icrası və qəbul olunması rəal olan təkliflərini verən hər bir duyarlı vətəndaşımıza öncədən minnətdarlığımı bildirirəm. Bir həftə ərzində bu təklifləri dəyərləndirib kampaniya üçün dəqiq iş planı hazırlayıb gerçəkləşdirməyə başlayacağıq. İstərdim ki, siyasi mövqeyimi təqdir etməyən, dünyagörüşümü paylaşmayan insanlar da bu məsələdə səmimiliyimizi şübhə salmağa çalışmasınlar. Dəstək verməsələr də, əngəl olmasınlar. Allah niyyətimizi uğura calasın.