I ixtisas qrupu üzrə qabiliyyət imtahanları başlayıb

Bu gündən I ixtisas qrupunda xüsusi qabiliyyət imtahanı tələb edən ixtisaslara qəbul olmaq istəyən və qabiliyyət imtahan komissiyasında qeydiyyatdan keçmiş abituriyentlərin qabiliyyət imtahanları başlayıb.

Tələbə Qəbulu üzrə Dövlət Komissiyasının (TQDK) mətbuat xidmətinin rəhbəri Elnur Nağızadə APA-ya açıqlamasında deyib ki, onlar 25 iyul-1 avqust tarixlərində Memarlıq və dizayn istiqaməti üzrə qabiliyyət imtahanı verəcəklər. Qabiliyyət imtahanından müvəffəqiyyətlə keçməyən abituriyentlər isə müsabiqə şərtini ödədikləri halda I ixtisas qrupuna daxil olan digər ixtisasların müsabiqəsində iştirak edə biləcəklər.

Qeyd edək ki, Azərbaycanda 2013/2014-cü tədris ili üçün ali təhsil müəssisələri və tam orta təhsil bazasında orta ixtisas təhsili müəssisələri üzrə qabiliyyət imtahanları iyulun 18-dən etibarən başlayıb. İlk olaraq III ixtisas qrupunda xüsusi qabiliyyət imtahanı tələb edən ixtisaslara qəbul olmaq istəyən və qabiliyyət imtahan komissiyasında qeydiyyatdan keçmiş abituriyentlər iyulun 18-dən 24-dək musiqi sənəti, təsviri sənət, teatr, kino və xoreoqrafiya sənəti istiqamətləri üzrə qabiliyyət imtahanından keçiblər. Növbəti qabiliyyət imtahanı isə idman istiqaməti üzrə 31 iyul-12 avqust tarixlərində olacaq. Kolleclərə qabiliyyət imtahanları isə avqustun 5-dən 13-dək keçiriləcək.

AzNews.az