Azərbaycan dili dövlət kimliyimizdir!

Əvvəlcə onu deyim ki, mən türklərin Azərbaycan coğrafiyasında avtoxon olması konsepsiyasını qəbul etmirəm. Şumerlər və türklər arasında eynilik axtaranlara da ciddi yanaşa bilmirəm. Biz türklər Altay mənşəliyik. Azərbaycana ayağı dəyən ilk türk, daha doğrusu prototürk Alp Ər Tunqadır. E.ə. 1-ci minilliyin başlarında yaşamış skif hökmdarı Bərdənin, Gəncənin və Güney Azərbaycanda neçə-neçə şəhərin əsasını qoyub. Alp Ər Tunqa yunan və Roma qaynaqlarındakı Partatua, fars poeziyasında Əfrasiyabdır. Partatua-Partav-Bərdə bu gün toponim şəklində yaşayır. Bu barədə AMEA-da çox ciddi tədqiqatlar aparılıb. Eramızdan əvvəl və sonra indiki Azərbaycan coğrafiyasına türklər daim axın ediblər. İslam yayılana qədər və həmin ərəfədə hunlar və xəzərlər Azərbaycanda əsas etnik güclərdən biri olub. Ağ hunların bir qolu olan ağaçərilər müasir Azərbaycan dilinin formalaşmasına önəmli təsir göstərib. Məhz onların sayəsində səlcuqlularla Azərbaycana gələn oğuzların dili bölgəmizdə xüsusi dialektə çevrilib. Orta çağlarda dillər "milli şüurun ifadəsi" deyildi. Çünki millətlər kapitalizmin əsəridir. Odur ki, Dədə Qorqud dastanı da, Uzun Həsən də bizim olduğu qədər türkmənlərin, türkmənlərin olduğu qədər də digər türklərindir. Çünki orta çağlarda millət yox, tayfa anlayışı əsas idi. Türkmənlər və türkmənlərin daxil olduğu oğuz qrupu bizim etnogenizimizin formalaşmasında mühüm yer tutur, ancaq yeganə komponent deyil. Qıpçaqlar, moğollar və digər qruplar da iştirakçıdırlar. Üstəlik, qeyri-türklər də zaman-zaman xalqımızla qaynayıb, qarışıb.