• Fanat
  • 3 Aprel 2019 13:38
  •  598

Azərbaycan idmançısı olimpiya medalını geri qaytardı

"Medalımı bu gün geri qaytardım".

Azərbaycan ağırlıqqaldıranı Valentin Xristov 2012-ci il London Yay Olimpiya Oyunlarında qazandığı bürünc medalı geri qaytarıb.

Bu barədə 25 yaşlı idmançının özü məlumat verib. O, bildirib ki, mərhum edildiyi medalını bu gün Milli Olimpiya Komitəsinə təhvil verib: “Medalımı bu gün geri qaytardım. Londonda üçüncü yeri tutan vaxtı yalnız medal almışdım. Diplom və nişan məndə yoxdur”.

Qeyd edək ki, Beynəlxalq Olimpiya Komitəsinin (IOC) İntizam Komissiyası olimpiada zamanı Xristovun antidopinq qaydalarını pozduğunu üzə çıxarıb. Bu, dopinq-testlərin təkrar analizləri nəticəsində müəyyənləşib. Bolqarıstanlı legionerin olimpiadadakı nəticələri ləğv olunub. Onun 56 kq çəki dərəcəsində qazandığı bürünc medalın isə həmin yarışda 4-cü yeri tutmuş vyetnamlı Tran Le Kuok Toana verilməsi qərara alınıb. Qərara əsasən, gənc idmançı medalla yanaşı, diplom və nişanı geri qaytarmalıdır.

Xristov 2012 və 2015-ci illərdə Avropa çempionu, 2011-ci ildə isə dünya çempionatının bürünc mükafatçısı olub. O, 2013-cü ildə orqanizmindən dehidrometiltestosteron tapıldığı üçün 2 il, 2015-ci ildə orqanizmindən nandrolon aşkarlandığı üçün 8 il müddətinə bütün yarışlardan kənarlaşdırılıb.(report.az)

AzNews.az