XI Qızıl Ordu Şuşaya daxil olub - 95 il öncə

Tarixdə bu gün: 12 may

Tarixdə bu gün mayın 12-də 1994-cü ildə Ermənistanla Azərbaycan arasında atəşkəs haqqında saziş - "Bişkek protokolu" qüvvəyə minib.

1830 - Ekvador respublikası yaradılıb.

1907 - Xalq artisti, bəstəkar və pedaqoq Səid Rüstəmov (1907 – 10.6.1983) İrəvanda anadan olub. "Beş manatlıq gəlin", "Durna", "Rəisin arvadı" musiqili komediyalarının və bir çox mahnıların mahnıların ( "Oxu tar","Qurban adına", "Həkim qız","Oxu, gözəl" və s.) müəllifidir. Azərbaycan Xalq Çalğı Alətləri Orkestrinin bədii rəhbəri və dirijoru olub. Musiqi məktəbləri üçün dərs vəsaitləri yazıb.

1920 - Azərbaycan Müvəqqəti İnqilab Komitəsi respublikada xalq məhkəmələrinin yaradılması haqqında dekret verib. Əksinqilab və təxribatçılığa qarşı mübarizə üçün Fövqəladə Komissiya və Ali İnqilabi Tribunal təsis edilib, həmçinin silki və mülki rütbələrin ləğv edilməsi barədə dekret verilib.

1920 - XI Qızıl Ordu hissələri Şuşaya daxil olub.

1940 - Şair, tərcüməçi, ədəbiyyatşünas Abbas Abdulla (Hacaloğlu) Gürcüstanın Bolnisi rayonunun Bolus Kəpənəkçi kəndində doğulub. Ukrayna ədəbiyyatından (Taras Şevçenko, Lesya Ukrainka və d.) dilimizə tərcümələr edib.

1949 - SSRİ Qərbi Berlinin blokadasını dayandırıb.

1994 - Ermənistanla Azərbaycan arasında atəşkəs haqqında saziş - "Bişkek protokolu" qüvvəyə minib. Sənədə Ermənistan və Azərbaycanın parlament sədrləri, həmçinin Dağlıq Qarabağın erməni və azərbaycanlı icmalarının rəhbərləri imza atmışdılar. Azərbaycan tərəfi sənədə iki əlavə ilə imza atıb. Protokolun 5-ci abzasında "tutulmuş ərazilər" sözü "işğal olunmuş ərazilər"lə əvəzlənib və atəşkəsdən sonra cəbhə xəttində yerləşdiriləcək müşahidəçilərin isə "beynəlxalq müşahidəçilər missiyası" olması qeyd olunub. Sənədə əsasən, tərəflər tezliklə beynəlxalq vasitəşilik sayəsində "Böyük sülh sazişi" imzalamalı idilər.

1995 - Azərbaycanla Venesuela (ölkəmizin müstəqilliyini 1992-ci il yanvarın 9-da tanıyıb) arasında diplomatik münasibətlər qurulub.

2008 - Çinin Sıçuan əyalətində baş verən zəlzələdə 70 000 nəfər həlak olub, 400 000-dək insan xəsarət alıb.

2011 - Tanınmış rejissor, aktyor, Əməkdar incəsənət xadimi Vaqif İbrahimoğlu (Həsənov; 18.10.1949 – 2011) vəfat edib. 1982-1989-cu illərdə Musiqili Komediya Teatrında baş rejissor işləyib, Milli Dram Teatrında, habelə Türkiyədə, Estoniyada tamaşalar hazırlayıb. 1989-cu ildə "Yuğ" Teatrını yaradıb və ömrünün sonunadək ona rəhbərlik edib. Bir sıra filmlərdə çəkilib: "Dantenin yubileyi", "Qəm pəncərəsi", "Otel otağı", "Sahə" və s.