Azərbaycan 18-ci qızılı qazandı

Tanınmış idmançımız İlham Zəkiyev Avropa Oyunlarında gözdən əlil cüdoçuların yarışında qızıl medal qazanıb.

AzNews.az xəbər verir ki, bu gün Heydər Əliyev adına İdman Sarayında paracüdoçular arasında yarış keçirilib. Azərbaycanı Avropa Oyunlarının gözdən əlil kişi cüdoçuların 90 kq-dan artıq çəkidəki yarışında təmsil edən 2 dəfə Paralimpiya Oyunları çempionu, 2 dəfə dünya çempionu, 5 dəfə Avropa çempionu İlham Zəkiyev finalda Oleksandr Pominovla qarşılaşıb.

Azərbaycan Prezidenti İlham Əliyevin də izllədiyi görüşdə tamaşaçılar tatami üzərində maraqlı və gərgin mübarizənin şahidi olublar. Əvvəlcə hakim təmsilçimizi bir sido cərimə xalı ilə cəzalandırıb. Daha sonra onun ukraynalı rəqibi eyni aqibəti yaşadan hakim ardınca idmançımızı da sido cərimə xalı verib. Buna baxmayaraq, rəqibinə vaza-ari ilə qiymətləndirilən fənd işlədərək onu tatamiyə çırpan İlham Zəkiyev ardınca saxlama (asai-komi) fəndi tətbiq edib və ipponla vaxtından əvvəl qalib gəlib və Avropa Oyunlarının çempionu adını qazanıb.

Beləliklə, yarışlarda cəmi 2 görüşə çıxaraq, hər ikisində də qalib gələn paracüdoçumuz Avropa Oyunlarının qızıl medalına layiq görülüb. İlham Zəkiyev bunadək yarımfinalda Yunanıstan təmsilçisi Klimiz Papaxristosu məğlub etmişdi.

Xatırladaq ki, cüdo Avropa Oyunlarında yeganə idman növüdür ki, paralimpiyaçıların yarışı baş tutur. Cəmi bir gün keçirilən paralimpiyaçıların yarışlarında Azərbaycanı 3 gözdən əlil cüdoçu təmsil edib. Onlardan 90 kq-dan artıq çəkidəki digər kişi təmsilçimiz Zakir Mislimov Oyunların bürünc, 57 kq-dək çəki dərəcəsində çıxış edən qadın paracüdoçumuz Səbinə Abdullayeva isə Oyunların gümüş medalını əldə edib.

Qeyd edək ki, bu gün cüdo yarışlarına ümumilikdə Azərbaycanın 8 idmançısı qoşulub. Onlardan 5 nəfəri - Xanım Hüseynova (-63), Nuriyyə Axundova (-63), Nərgiz İbrahimova (-70), Validə Mirzəzadə (-70) və Rüstəm Orucov (-73) mübarizəni erkən mərhələlərdə dayandırıb.