Müasir iş dünyasında psixologiyanın rolu - Psixoterapevt Dilbər Bəhmənli ilə müsahibə

İş dünyasında uğurun yalnız peşə biliklərindən asılı olmadığını düşünmüsünüzmü?

AzNews.az olaraq, bu mövzuda psixoterapevt Dilbər Bəhmənli ilə müsahibə etdik və müasir əmək mühitində psixologiyanın əhəmiyyəti, işçilərin qarşılaşdığı çətinliklər və onların həlli yolları barədə maraqlı fikirlər dinlədik.

– Müasir iş dünyasında psixologiyanın rolu nə dərəcədə əhəmiyyətlidir?

İş dünyasında uğurun yalnız peşə bilikləri ilə ölçüldüyü dövr artıq keçmişdə qaldı. Bugünkü əmək bazarında emosional zəka, komanda işi, stress idarəsi və liderlik bacarıqları ən az texniki bilik qədər vacibdir. Psixologiya iş mühitində əməkdaşların motivasiyasını, yaradıcılığını və məhsuldarlığını qorumaq üçün əsas dayaqlardan biridir.

– Stres və tükənmişlik (Burnout) müasir dövrdə iş mühitin ən çox rastlanan problemlərdir. Bunların səbəbi nədir?

Əsas səbəb sürətli dəyişən mühit, yüksək rəqabət və daim “Daha çox iş, daha çox nəticə” gözləntisidir. İşçilər fasiləsiz onlayn olmaq məcburiyyətində qalır, şəxsi həyatla iş balansı itir. Bu isə həm emosional, həm də fiziki tükənməyə gətirib çıxarır.

– Şirkətlər və rəhbərlər bu vəziyyətdə hansı addımları atmalıdırlar?

İlk növbədə, işçilərin psixoloji rifahı şirkət strategiyasının bir hissəsinə çevrilməlidir. Praktiki addımlar bunlardır:

-Fasilə və istirahət mədəniyyətini təşviq etmək;
-Komanda içində açıq ünsiyyət mühitini yaratmaq;
-Psixoloji dəstək və ya konsultasiya xidmətləri təklif etmək;
-Real və ölçülə bilən iş hədəfləri qoymaq.

– Remote (Uzaqdan) iş modeli getdikcə daha çox yayılır. Bu modelin psixoloji üstünlükləri və riskləri hansılardır?

Üstünlükləri ondan ibarətdir ki, vaxt və məkandan azadlıq və şəxsi həyata daha çox zaman ayırmaq imkanı yaradır.
Riskləri isə budur ki, sosial təcrid, ünsiyyətin zəifləməsi və motivasiya itkisinə səbəb ola bilir. Buna görə uzaqdan işləyənlər üçün virtual komanda görüşləri, onlayn sosial fəaliyyətlər və gündəlik strukturun qurulması vacibdir.

– İş dünyasında psixoloji davamlılıq necə formalaşdırıla bilər?

Bu, həm fərdin, həm də kollektivin məsuliyyətidir. Fərd özünü inkişaf etdirməli, stres idarəsi texnikalarını öyrənməli, sağlam həyat tərzini qorumağa çalışmalıdır. Şirkətlər isə işçilərin güclü və zəif tərəflərini nəzərə almalı, dəstəkverici mühit formalaşdırmalıdır. Ən əsası, “Uğur yalnız nəticə ilə ölçülmür” mesajı həm fərdlərə, həm də kollektivlərə ötürülməlidir.

– Sonda işçilərə hansı psixoloji mesajı vermək istərdiniz?

Özünüzü yalnız işlə tanımlamayın. İş həyatınızın bir hissəsidir, amma həyatınız işdən ibarət deyil. Özünüzə, yaxınlarınıza və ruhunuza vaxt ayırmaq da peşəkar uğurun ayrılmaz hissəsidir. Unutmayın, uğur qazana bilmək üçün psixoloji sağlamlıq önəmlidir və psixoloji sağlamlıq isə iş və şəxsi həyat balansını qorumaqla başlayır.

Nuray,

AzNews.az