Qarabağ və Balakən bölgəsində dağ-xizək turizminin inkişafı istiqamətində hazırlıqlar başlanıb

Azərbaycanın turizm potensialının artırılması istiqamətində atılan addımlar davam edir. Bu dəfə diqqət dağ və xizək turizminin inkişafına yönəlib. Dövlət Turizm Agentliyi Qarabağ bölgəsində, həmçinin Balakən rayonunda bu sahənin perspektivlərini genişləndirmək üçün yeni təşəbbüslərə start verib. Agentlikdən AzNews.az-a verilən məlumata görə, artıq müvafiq hazırlıq işlərinə başlanılıb və bu məqsədlə beynəlxalq təcrübəyə əsaslanaraq İspaniyanın tanınmış “NEUGEST 1957” şirkətindən məsləhət xidməti almaq qərara alınıb.

Layihənin məqsədi Azərbaycanın təbii-coğrafi imkanlarından istifadə etməklə ölkəyə həm daxili, həm də xarici turist axınını artırmaq, xüsusilə qış mövsümündə alternativ turizm istiqamətlərini formalaşdırmaqdır. Qarabağ bölgəsi və Balakən rayonu iqlim, relyef və mövcud infrastruktur baxımından dağ-xizək turizmi üçün əlverişli coğrafiyaya malikdir. Bu isə, uzunmüddətli dövrdə regionların sosial-iqtisadi inkişafına, yeni iş yerlərinin açılmasına və yerli əhalinin rifahının yüksəldilməsinə töhfə verə bilər.

İspaniyanın “NEUGEST 1957” şirkətinin bu sahədə geniş təcrübəsi olduğu bildirilir. Qurumun Azərbaycanın müvafiq təbii ərazilərində müasir dağ-xizək infrastrukturlarının planlaşdırılması, ekoloji dayanıqlılığın qorunması və təhlükəsizlik standartlarının tətbiqi ilə bağlı tövsiyələr verməsi gözlənilir. Bu tövsiyələr əsasında ərazilərin turizm üçün uyğunluğu qiymətləndiriləcək, təbiətə minimal müdaxilə ilə funksional və cazibədar turizm marşrutları formalaşdırılacaq.

Mütəxəssislərin fikrincə, Azərbaycanın mövcud xizək turizmi mərkəzləri – Qəbələ və Qusar bölgəsində yerləşən komplekslər bu sahənin inkişafında önəmli təcrübə qazandırıb. İndi isə eyni yanaşmanın Qarabağ kimi strateji və simvolik əhəmiyyətə malik bir bölgədə tətbiq olunması, həm regionun bərpasına, həm də ölkənin beynəlxalq turizm xəritəsində daha önəmli yer tutmasına səbəb ola bilər.

Bununla yanaşı, Balakən bölgəsi dəhşətli təbiəti, dağlıq relyefi və sərhəd bölgəsi kimi logistik imkanları ilə seçilir. Qış turizmi ilə yanaşı, yay aylarında yürüş, dağçılıq və ekoturizm baxımından da əhəmiyyətli imkanlar təqdim edir. Mütəxəssislər bu cür layihələrin həm yerli icmaların iştirakı ilə həyata keçirilməsinin, həm də turizmə dayanıqlı yanaşmanın tətbiq olunmasının vacibliyini vurğulayırlar.

Hazırda aparılan hazırlıq mərhələsi gələcəkdə texniki-iqtisadi əsaslandırma və layihələndirmə mərhələləri ilə davam etdiriləcək. Dövlət Turizm Agentliyi bildirir ki, məqsəd yalnız infrastruktur yaratmaq deyil, həm də bölgələri yeni brend turizm məkanları kimi formalaşdırmaqdır. Bu isə, təkcə turizm sahəsinə deyil, ümumilikdə ölkənin iqtisadi və mədəni inkişafına müsbət təsir göstərəcək.

AzNews.az