Azərbaycanda "Yeni Nəsil Texnologiyalar Mərkəzi" yaradılacaq - ŞƏRH

Azərbaycan rəqəmsal iqtisadiyyat sahəsində strateji bir addım ataraq "Yeni Nəsil Texnologiyalar Mərkəzi"nin yaradılmasını planlaşdırır. Prezident İlham Əliyevin təsdiqlədiyi 2026-2029-cu illər üçün Strategiyaya əsasən, mərkəz həm müəssisələrə təlim və texnologiya tətbiqi dəstəyi verəcək, həm də rəqəmsal transformasiya prosesini praktiki şəkildə həyata keçirəcək. Məqsəd, biznes proseslərinin optimallaşdırılması və “öyrən və transformasiya et” modeli ilə müəssisələrin məhsuldarlığının və sektor üzrə rəqabət qabiliyyətinin yüksəldilməsidir.

Qlobal təcrübə göstərir ki, analoji mərkəzlərin təsiri həm mikro, həm də makroiqtisadi səviyyədə ölçülə bilər. Türkiyənin "MEXT Rəqəmsal Bacarıqlar Mərkəzi" və Sinqapurun "Digital Capability Center" nümunələri göstərir ki, müasir texnologiyaların tətbiqi nəticəsində işçi məhsuldarlığında 15-30 %, sektor səviyyəsində isə 10-30 % artım mümkündür. Bu göstəricilər yalnız proseslərin avtomatlaşdırılması ilə deyil, həm də işçi heyətinin rəqəmsal bacarıqlarının artırılması və məlumat əsaslı qərarvermə mexanizmlərinin tətbiqi ilə bağlıdır. Azərbaycanda mərkəzin fəaliyyəti nəticəsində əməliyyat səmərəliliyinin 5–10 % yüksələcəyi proqnozlaşdırılır ki, bu da müəssisələrin xərclərini optimallaşdırmaq və rəqabət qabiliyyətini möhkəmləndirmək üçün mühüm amildir.

Eyni zamanda, yeni texnologiyaların tətbiqi ilə ölkədə beynəlxalq standartlara cavab verən 2-dən çox data mərkəzinin fəaliyyəti planlaşdırılır. Bu, yalnız rəqəmsal transformasiyanı sürətləndirməklə kifayətlənmir, eyni zamanda informasiya təhlükəsizliyi və yüksək sürətli məlumat axınının təmin olunması baxımından strateji əhəmiyyət kəsb edir. Qlobal kontekstdə informasiya-kommunikasiya texnologiyaları (İKT) sektorunun qeyri-neft ÜDM-də payının artırılması ölkələrin iqtisadi inkişafında əsas indikatorlardan biridir. Azərbaycanın bu sahədə irəliləyişi regional rəqabət qabiliyyətinin güclənməsinə və xarici sərmayələrin cəlb olunmasına şərait yaradır.

Mərkəzin uğurla fəaliyyətə başlaması, azı 25 müəssisənin təlimlərə cəlb olunması və rəqəmsal transformasiya xidmətlərindən faydalanan müəssisələrin sayının hər il artması strateji məqsədlərin konkret əməli nəticələrə çevrilməsinə imkan verəcək. Bu, həm dövlət siyasətinin innovativ iqtisadiyyat prinsipləri ilə sinxronlaşmasını, həm də mikroiqtisadi səviyyədə biznes mühitinin səmərəliliyinin artmasını təmin edir. Nəticədə, rəqəmsal iqtisadiyyatın qeyri-neft ÜDM-də payının yüksəlməsi və İKT sektorunun davamlı inkişafı Azərbaycanın uzunmüddətli dayanıqlı iqtisadi modelinə töhfə verəcək.

Aznews.az