“Toppuş bacı”nın əməliyyatı uğursuz alınıb” - Həkimi danışdı

“Əməkdar artist Tünzalə Əliyevanın birinci əməliyyatı uğursuz alınıb”.

Bunu AzNews.az-a açıqlamasında piylənmə üzrə mütəxəsis Sevinc Şirinova xərçəng xəstəliyindən əziyyət çəkən Tünzalə Əliyevanın səhhətindən danışarkən deyib. Həkimin sözlərinə görə, aktrisa mədə kiçiltmə əməliyyatının aparılması üçün ona 5 il bundan öncə müraciət edib:

“Bir-birimizin xətrini çox istəyirik. 5 il bundan öncə bu əməliyyatla bağlı bizə müraciət edib. Amma müəyyən səbəblərdən Tünzalə xanım əməliyyatını bizə deyil, türkiyəli həkimə etibar etdi. Mən də verilişlərin birində dedim ki, Tünzalə Əliyevanın əməliyyatı uğuruz alınıb. Əməliyyatdan sonra aktrisa arıqlamadı. Bunu Tünzalə xanımın özü də etiraf etdi. Aktrisa məcbur olub ikinci dəfə mədə kiçiltmə əməliyyatı etdirdi. İkinci əməliyyatı Tariyel həkim apardı və çox da uğurlu alındı”.

Sevinc Şirinova qeyd edib ki, Tünzalə Əliyevanın əziyyət çəkdiyi xərçəng xəstəliyi ilə keçirdiyi mədə kiçiltmə əməliyyatının heç bir əlaqəsi yoxdur: “Ginekologiya ilə mədənin heç bir əlaqəsi yoxdur”.

Qeyd edək ki, əməkdar artist Tünzalə Əliyeva iki dəfə mədə kiçiltmə əməliyyatı keçirib. Bundan bir müddət sonra isə səhhəti pisləşən aktrisada xərçəng xəstəliyi aşkarlanıb və dərhal əməliyyat olunub.

Bahar RÜSTƏMLİ
AzNews.az