Tütün məmulatlarının aksiz dərəcələri 11 dəfə artırılır

Sözügedən dəyişikliklər Milli Məclisin komitə iclasında müzakirə ediləcək

Elektron siqaretlər üçün maye və tütündən hazırlanan siqaretlər və onun əvəzedicilərinə tətbiq edilən aksiz dərəcələrinin artırılması təklif edilir.

AzNews.az xəbər verir ki, Vergi Məcəlləsinə təklif edilən dəyişikliyə görə, elektron siqaretlər üçün mayenin hər litrinə tətbiq edilən aksiz dərəcəsi 20 manatdan 220 manata, tütündən hazırlanan siqaretlər və onun əvəzedicilərinin hər 1000 ədədinə tətbiq edilən 31 manat aksiz dərəcəsi 35 manata qaldırılacaq.

Həmçinin, məcəlləyə iki yeni məhsulun aksiz dərəcəsinə cəlb edilməsi təklif edilir. Bunlar qəlyan üçün tütünlər və istehsal məqsədli tütünlər istisna olmaqla, digər çəkməli tütünlər, “homogenləşdirilmiş” və ya “bərpa edilmiş” tütünlər, çeynənilən və ya buruna çəkilən tütünlər – hər kiloqramına 30 manat və qızdırılma nəticəsində istehlak edilən (buxar) tütün və tütün məhsulları – 1000 ədədinə 12,9 manat aksiz dərəcəsinin tətbiq edilməsi təklif olunur.

Sözügedən dəyişikliklər Milli Məclisin komitə iclasında müzakirə ediləcək.