Heyvan sağlamlığına nəzarət gücləndirilir

Cari ilin 11-22 avqust tarixlərində respublika ərazisində atların, arıların və donuzların sağlamlıq vəziyyəti ilə bağlı xüsusi təhlükəli xəstəliklər üzrə genişmiqyaslı klinik müşahidələr və laborator diaqnostik tədbirlər həyata keçiriləcək. Bu barədə Azərbaycan Qida Təhlükəsizliyi Agentliyi (AQTA) məlumat yayıb. Bildirilib ki, monitorinq çərçivəsində yalnız xəstəliklərin aşkarlanması deyil, eyni zamanda təsərrüfatlara ümumi baxış keçiriləcək, baytarlıq norma və qaydalarına əməl olunması üçün maarifləndirmə-təbliğat tədbirləri reallaşdırılacaq. Bundan əlavə, epizootoloji məlumatlar toplanaraq təhlil ediləcək və müşahidə aparılan ərazilərlə bağlı nəticələr xüsusi elektron sistemə daxil ediləcək. Monitorinq prosesində AQTA, Qida Təhlükəsizliyi İnstitutu və Kənd Təsərrüfatı Nazirliyi yanında Aqrar Xidmətlər Agentliyinin mütəxəssisləri yaxından iştirak edəcəklər.

Atlar, arılar və donuzlar bir sıra zoonoz və epizootik xəstəliklərə qarşı xüsusilə həssasdır. Atlar arasında yayıla biləcək başlıca xəstəliklərdən biri qarayara (antraks) xəstəliyidir ki, bu da həm heyvanlar, həm də insanlar üçün ölümcül təhlükə yarada bilər. Digər təhlükəli xəstəliklər sırasında atlarda rast gəlinən qrip, ruam (glanders) və ensefalomielitlər də var. Arılar arasında yayılan əsas xəstəliklərə Amerika və Avropa çürük xəstəlikləri, nosematoz və varroatoz daxildir ki, bunlar həm arı ailələrinin kütləvi tələf olmasına, həm də ekoloji balansın pozulmasına səbəb ola bilər. Donuzlarda isə afrikansayağı donuz vəbası (ASF), klassik donuz vəbası, brusellyoz və trixinellyoz kimi xəstəliklərə rast gəlinir. Bu infeksiyaların bəziləri zoonoz xarakter daşıyaraq insan sağlamlığı üçün də təhlükə yaradır. Məsələn, brusellyoz və trixinellyoz insanlara yoluxa bilər və ciddi tibbi fəsadlar törədə bilər.

Bu növ xəstəliklərin qarşısının alınmaması heyvanların kütləvi şəkildə tələf olması, kənd təsərrüfatında məhsuldarlığın azalması, ərzaq təhlükəsizliyinin təhdid altına düşməsi və insanlarda ciddi yoluxucu xəstəliklərin yayılması ilə nəticələnə bilər. Buna görə də keçirilən monitorinq tədbirləri yalnız heyvanların deyil, bütövlükdə ictimai sağlamlığın qorunması baxımından mühüm əhəmiyyət daşıyır. Profilaktik yanaşma və vaxtında müdaxilə, həm baytarlıq, həm də epidemioloji risklərin idarə olunmasında əsas vasitədir.

AzNews.az