Məşhur həkim: “Koronavirus zəifləyib və əvvəlki qədər ölümcül deyil”

O, bunu İtaliyada son vaxtlar müşahidə olunan koronavirus xəstələrinin vəziyyəti ilə əsaslandırıb

Yoluxucu xəstəliklər üzrə italiyalı professor Matteo Bassetti koronavirusun keçirdiyi mutasiyalar səbəbindən zəiflədiyini və ölümcül təsirinin azaldığını açıqlayıb.

AzNews.az “NTV”yə istinadən xəbər verir ki, mütəxəssis bu gedişlə peyvəndə ehtiyac olmadan virusun tədricən yox olacağını qeyd edib. O, bunu İtaliyada son vaxtlar müşahidə olunan koronavirus xəstələrinin vəziyyəti ilə əsaslandırıb.

Bassettinin sözlərinə görə, hazırda İtaliyada insanlar xəstəliyi nisbətən daha yüngül keçirir və əvvəlki qədər yüksək dozalarda yoluxmalar müşahidə olunmur. Onun fikrincə, buna səbəb bir neçə faktor ola bilər: Virusun genetik mutasiya ilə daha az ölümcül olması, sosial məsafə qaydaları və sağalmış xəstələrin sahib olduğu immunitet.

“80 və 90 yaşlı pasiyentlər belə yataqda sərbəst şəkildə hərəkət edir və nəfəs ala bilirlər. Eyni xəstələr bir ay əvvəl yoluxsaydılar, öləcəkdilər”,- deyə Bassetti bildirib. O qeyd edib ki, virus xüsusilə ağciyərlərə daha az zərər verən genetik mutasiyaya uğrayıb.

Ancaq dünya üzrə bir sıra digər mütəxəssislər virusun zəiflədiyinə dair iddiaların şübhəli olduğu və buna dair heç bir sübutun mövcud olmadığı qənaətindədirlər.